Loron ikus kapitulu provincial nian, dader hahú ho orasaun no santa misa ne’ebe tau intensaun nu’udar momentu agradesimentu ba Maromak matenek-Nia hun ne’ebé loron haat nia laran inspira ona kapitular sira konsege hala’o serbisu ho di’ak. Durante misa Pe. Agostinho Soares, SDB iha nia omilia subliña kona ba leitura sira domingu nian hodi fó hanoin libru Sabedoria nian dehan katak matenek ne’e mai husi Maromak no Nia mak hun. Hafoin dehan teni, ohin loron Maromak konvida ita atu rona,la’os deit ida ne’ebé matenek liu maibé ema hot-hotu. Loos duni durante kapitulu inspetorial atetude rona nian sai dimensaun importante ida, iha ne’ebé ema hot-hotu livre hodi fó sai ninia hanoin no sujestaun sira.
Durante orasaun abertura ba loron ikus kapitulu inspetorial-nian Espiritu Santo haroman hodi reflete no serbisu ho di’ak. Maromak-Nia liafuan ne’ebé akompaña durante loron ne’e mak Evanjellu Saun.Mateud nian 25, 1-13, ho aiknanoik feto virjen nain sanulu, lima matenek no lima beik. Matenek sira prepara sira-nia mina maibé beik sira laiha preparasaun. Mensajen husi pasajen ne’e mak ema presiza matan moris no neon nain iha Maromak-Nia intervensaun moris nian.
Tempu hanesan grupu redasaun mós aprezenta serbisu final kona-ba nukleu III parte II, nu’udar serbisu ikus nian iha kapitulu Inspetorial ne’e. Hotu tiha aprezentasaun, fahe tan kapitular sira ba grupu tolu atu estuda fila fali kona-ba sujestaun sira ba Instituto no Ispetoria, depois sharing hotu husi grupu ida-ida fó ba iha redasaun no tuir mai grupu ida-ida aprezenta iha asemblea ho sira-nia rezultadu estudu no sujestaun sira seluk ne’ebé grupu sira hato’o iha grupu. Molok han meudia madre provincial agradese kapitular sira, liuliu ba leigu sira-nia prezensa no sira-nia kolaborasaun durante kapitulu provincial, iha loron lima nia laran, nune’e fó rekordasaun Santa Maria Troncatti nian imajen nu’udar sinal agradesementu nian ba sira.
Mestre Julio ne’ebe representa komunidade edukativa husi eskola Maria Auxiliadora hato’o ninia parabens ba madre sira, katak kapitulu inspetorial la’o ho di’ak, no nia agradese ba konvite ne’ebé simu hodi bele partesipa iha eventu ida ne’e, kondivisaun sira tulun sira hodi komprende oinsa sira nia serbisu hamutuk ho madre iha misaun edukativa. Nia subliña parte sira ne’ebe fo nafatin forza no ksolok atu kontinua serbisu mak momentu orasaun, jogos animadu, maske iha servizu barak maibé fuan haksolok nafatin no hakarak boot nafatin atu serbisu. Parte seluk Presidente ADMA Sr. João Brito, hato’o ninia agradesimentu ba madre provincial no kapitular sira hotu hafoin fahe mós ninia esperiensia fiar nian liuhusi devosaun ba na’in feto Auxiliadora. No joven feto nain rua, komunidade edukativa husi eskola Maria Auxiliadora-nian no husi antiga aluna SDB-nian sira mós ho fuan kontente agradese ba madre provincial no FMA hot-hotu ba esperiensia ne’ebe sira hetan durante loron lima nia laran. Sr. Angelita Gomes nu’udar reguladora, agradese ba Maromak ba grasa roman nian ne’ebé haroman kapitular sira hodi halo serbisu ho di’ak, no mós agradese ba madre provincial, konsellu inspetorial no ekipa hotu ne’ebe kolabora ba susesu kapitulu nian. Atividade kapitulu ne’e remata ho orasaun agradesimentu-nian basá hodi Espirito Santu nia roman no gia buat hotu la’o ho susesu.
Sr. Lucia Pereira, FMA


