Kapitulo inspetorial ba loron daruak nian, hahu orasaun dader no Eukaristia iha Kapela Noviziadu, selebra husi Pe. Anacleto Pires,SDB, nu’udar provinsial Salesiano sira nian. Padre nia mensajen fo hanoin hikas fila fali kona ba tema kapitulo nian “ Rahun diak ba imi, Ho kbiit profétika karizma nian, misionária komuñaun nian hamutuk ho foin-sa’e sira”. Rahun diak tanba Maromak bolu ita husi background oioin, Nia fihir no hili atu ba haklaken ninia liafuan tuir karisma salesiana, misaun ne’e mak eduka no evanjeliza, Nia haruka atu haklaken laos ba mesa-mesak maibe nain rua-rua. Nune’e iha ita nia misaun ne’ebe ita simu mos ita la halo mesa-mesak maibe hamutuk ho ita nia komunidade Edukativa sira.
Tuku 8 kapitular sira hasoru malu fali iha aula Kapitulu nian hodi hahu ho orasaun Nucleo dahuluk ne’ebé koalia konaba ’Oins’a moris grasa unidade nian, Forsa profetika Karisma nian, ne’e halo ita sai Dixipula misionaria ksolok nian”. Konvokasaun ba Espiritu Santu, agradese ba diak hotu ne’ebé ita halo tiha ona, husu naroman Espiritu Santu nian tulun no gia ba misaun tuir mai. Orasaun dader hasa’e ho simbolu Maromak Nia Liafuan ne’ebé gia no transforma ita ba moris komuñaun; simbolu daruak mak Konstitusaun atu moris stuir Karisma Salesiana iha realidade moris loron loron nian. Simbou datoluk kuadru Maria Ausiliadora, Feto rahun diak, dixipula no misionaria, ita aprende benaventuransa haraik an nian no komprende diak liutan ita nia saran an nian. Orasaun taka ho knananuk ba Nain Feto ne’ebé la’o nafatin ho ita.
Hafoin Irman Evangelina da Costa Xavier FMA, Provinsial atual hato’o liafuan ne’ebé foti husi reflesaun “BEATITUDE/RAHUN DIAK” diskursu iha foho leten, Jesus fo hanorin foun ida ba nia eskolante sira no ba sira hotu ne’ebé tur Nia. Beatitude nu’udar matadalan konkretu atu moris tuir Maromak nia fuan. Ksolok ba sira ne’ebé kiak iha Espiritu, basá Reinu lalehan sira nian. Beatitude ida ne’e mak sira ne’ebé tau sira nia dependensia tomak ba Maromak no la dipende deit ba nia forsa ka ba rikusoin; ksolok ba sira ne’ebé laran kmaus, basá sira sei simu rai nu’udar lima rohan, ne’e mak ksolok karismatika konkretiza iha sistema preventivu; ksolok ba sira ne’ebé hamlaha no hamro’ok ba justisa tanba sira sei bosu. Signifika maski ema terus barak tanba injustisa, maibé Justisa lolos sei hetan deit iha lalehan; ksolok ba sira ne’ebé laran sadia basá sira sei hetan laran sadia, ita presiza iha laran sadia ida ne’e atu ita bele fahe ba ema seluk; ksolok ba sira ne’ebé laran moos, basá sira sei hare Maromak, ita hotu presiza laran moos no livre husi egoizmo, ipokrezia no sala; ksolok ba sira ne’ebé buka dame, basá sei bolu Maromak oan, signifika ita la evita konflitu maibé hakas an ho ativiu hodi hari dame; ksolok ba sira ne’ebé hetan presegição tan justisa basá reinu lalehan sira nian, fidelidade iha injustisa no terus ba Evanjellu, Maromak rasik haraik moris rohan laek. Ksolok ba imi waihira ema koalia a’at imi, halo terus imi. Haksolok nafatin no la kolen atu halo diak. Beatitude konvida ita atu moris tuir Jesus nia dalan, transforma ita nia fuan no atu hari mundu ida ne’ebé hari iha domin, jsutisas no damen. Beatitude sira ne’e mak grasa unidade ne’ebé ita hare iha santa Maria Troncatti moris ho fuan ba deit Maromak. Ba madre Mazzarello Beatitude la’os buat ne’ebé nia halo maibé grasa unidade mak hela iha Maromak, unifika ita nia moris iha orasaun no kontemplasaun. Nune’e mós santa Teresa Avila hateten buat hotu sei liu maibé Maromak nia domin mak sei hela. Don Bosco no Madre Mazarello simu no moris tuir espiritu Evanjellu nia ksolok, simplisidade no domin ne’ebé konkretu. Ksolok loos la mai husi momentu diak no situasaun ne’ebé hakmatek maibé domin ba Maromak iha difikuldade. Tau abut iha Beatitude sira konvida ita atu sai komunidade ne’ebé moris ho ksolok. Laran metin iha terus no haksolok nafatin. Beatitude sira mak dalan atu sai hanesan Jesus, hare mundu no ema seluk ho domin, ne’e mak ita nia ksolok. Espiritualidade Don Bosco no Madre Mazzarello sira nia finalidade moris nian mak to’o ba ksolok lalehan nian ho Jesus no Maria ba nafatin “Ksolok iha rai no iha eternidade”.
Tuir mai rona Madre Jerál Madre Chiara Cazzuola, nia surat ba Irman Evangelina, ba irman sira no leigu kolaboradore sira kapitular, hato’o ninia akompanamentu ho orasaun. Madre Jerál hateten katak tempu kapitulu nian, sai momentu komunaun iha reflesaun no kondivisaun. Tempu mutua komunikasaun hodi konsidera relidade Indonesia no Timor ne’ebé haleu ita. Hanesan Maria ne’ebé ba vizita nia maluk Isabel mak dezefiu no oportunidade ida, Don Bosco no Madre Mazzarello sei tulun imi sai misionaria esperansa nian.
Iha oras tuku 9.20, Irman Angelita Gomes, nu’udar reguladora hato’o metodologia serbisu ohin ho diak no koresponsabilidade. Iha dader ida ne’e reguladora orienta kapitular sira atu hahu jornada ho reflesaun Nucleo dahuluk konaba “Oinsá ita moris iha grasa unidade nian, forsa profetika Karizma nian, ne’ebé halo ita sai dixipula misionaria ksolok?” Reflesaun ba nucleo dahuluk hala’o iha grupu to’o tuku 12. Iha oras tuku 13.45 kapitular sira hasoru malu fila fali atu aprezenta serbisu grupu to’o tuku 15.20. Hafoin Break ba reza tersu no hasoru malu fali tuku 16.20 ba asemblea sintesi nucleo dahuluk to’o tuku 17.40, tuir mai termina ho orasaun ikus nian.
Iha Buona Noite Provincial Ir. Evangelina da Costa Xavier hato’o ba Kapitular sira istoria konaba Sipu, kor oin-oin. Labarik ne’ebe hare sipu hirak ne’e hateten katak laiha sipu ida ne’ebe mak la folin. tanba sira ida-idak iha nia beleza hetan protesaun no pertense ba tasi no ema ida. Bainhira iha laloran boot, sipu sira ne’e soke malu, maibe sira kontinua diak ba malu. Hanesan sipu ita ida-ida lori ita nia istoria no esperiensia husi komunidade oin-oin, la hanesan maibe ita hotu hetan protesaun husi Maromak no hola parte ba familia ida. Don Bosco no Madre Mazzarello hateten katak ema ida-idak nia presenza mak don ida, hanesan sipu sira ita sei halibur nafatin iha Jesus nia fuan. Hanesan sipu ne’ebe furak iha tasi laran ita mós iha ita nia don sira iha komunidade.
Sr. Luisa Fernandes,FMA
