Enkontru ba dala lima Peregrinasaun Online Projetu Espiritualidade Misionária (PEM), ne’ebé promove hosi ambitu misaun Institutu Filhas de Maria Auxiliadora (FMA), iha kolaborasaun ho Ekipa PEM, hala’o iha loron 11 fulan-Outubru tinan 2026. Inisiativa ne’e lori partisipante sira ba fatin sira iha Amérika ne’ebé hahú vizita sira hosi FMA iha Amérika 1877.
Viajen ne’ebé fahe ba etapa ualu, halo parte iha preparasaun tinan tolu nian ba aniversáriu ba dala 150 Espedisaun Misionária Dahuluk (2024-2027). Tema mak “Agora tempu atu halakan fali ahi. Tinan 150 Misaun FMA nian.” Ninia objetivu mak «selebra ho fuan gratidaun laran-manas misionária Institutu nian atu hamoris hikas iha mundu kontemporánea ohin-loron nian impulsu profétika ita-nia karizma nian nu’udar don ba Kreda no umanidade» (Sirkulár No. 1038).
Hafoin para iha Villa Colón no Las Piedras iha Uruguai, Almagro no La Boca iha Arjentina, no Patagónia Norte, enkontru dalimak foka ba Patagónia Súl, Tierra del Fuego, no Punta Arenas iha Xile—rai dook sira iha ne’ebé misionáriu sira enkarna “profesia fronteira nian” loloos.
Feto sira ho karakter forte no fiar ne’ebé metin, ne’ebé dudu hosi paixaun ba Maromak nia Reinu, halo viajen ba fatin sira ne’ebé dook liu iha kontinente hodi oferese esperansa, no aprosimasaun ba sira ne’ebé moris iha kondisaun ne’ebé partikularmente vulneravel. Iha territóriu remota sira, FMA sai prezensa edukativa no evanjelizadora iha populasaun lokál no indíjena nia leet, hodi fó sasin kona-ba Evanjellu ho aten brani no dedikasaun.
FMA dahuluk, guia husi Madre Angela Vallese, to’o iha Punta Arenas iha loron 3 fulan Dezembru tinan 1888, durante Novena Imaculada Conceição. Liutiha loron balun, iha loron 8 fulan-Dezembru, loke Oratóriu dahuluk, entrega ba Maria Auxiliadora nia protesaun, ne’ebé sei akompaña no apoia kreximentu obra saleziana “iha mundu nia rohan”.
Iha karta ida ne’ebé dirije ba Don Rua iha tinan 1890, Madre Vallese hakerek: “suporta husi ninia bensaun, ita sei bá iha rai-na’in sira-nia leet no halo sira hadomi Jezús no Maria hanesan Don Bosco rekomenda molok nia mate”.
Serbisu edukativa dezenvolve lalais, no iha fulan-Marsu tinan 1889, loke eskola ki’ik ida ho estudante na’in sanulu-resin-tolu, ne’ebé ohin loron hanaran “Liceo Maria Auxiliadora”. Uma ne’ebá hatudu espíritu típiku Mornese nian: atmosfera família nian iha ne’ebé labarik-feto sira no feto-klosan sira aprende atu lee no hakerek, partisipa iha klase katesizmu nian, kurso kostura nian, no lisaun kanta nian, moris iha atmosfera ida ksolok nian, simplisidade nian no kura ho atensuan.
Husi Punta Arenas, dinamizmu misionáriu habelar liután ho fundasaun Misaun “San Rafael” iha Illa Dawson. Husi neʼebá, misionáriu sira la’o toʼo fatin sira iha parte súl nian ho ró kiʼik sira, hodi lori Kristu nia mensajen ba área sira neʼebé izoladu liu iha rejiaun neʼeba.
Iha diskursu abertura nian, Irmán Ruth del Pilar Mora, Konselleira Jerál ba Misaun, konvida partisipante sira atu reflete kona-ba signifikadu sai misionária «to’o rai nia rohan», hodi fo hanoin hikas mandatu evanjéliku: «Imi bá mundu tomak no haklaken Evanjellu ba kriatura hotu» (Mc 16,15).
Ninia liafuan sira fo hanoin oinsá misaun la’ós de’it movimentu jeográfiku ida, maibé hilin moris nian ne’ebé lori liu ema ida nia seguransa rasik, ba sira ne’ebé dook liu, sira ne’ebé haluha tiha ona, no sira ne’ebé eskluidu. Ahi misionáriu hanesan ne’ebé inspira Don Bosco no Madre Mazzarello kontinua ohin loron hodi bolu komunidade edukativa sira atu sai prezensa signifikativa iha periferia ezistensiál sira ita-nia tempu nian.
Hodi konklui nia diskursu, Konselleira ne’e dezeja ba komunidade edukativa sira hotu atu haburas aten-barani atu hakat liu baliza hotu, hodi transforma sira iha fatin enkontru nian, prezensa nian, no Evanjellu moris liuhusi jestu konkretu sira hakbesik no kura nian.
Testu kompletu: https://www.fmatin.org/wpn/download-category/fonte/
Fonte: cgfmanet.org


