Liturjia Domingu da-25 konvida fiar-na’in sira atu husik “sabedoria mundu nian” no hili “sabedoria Maromak nian”. “Maromak nia sabedoria” de’it – testu bíbliku domingu ne’e nian hateten – fó posibilidade ba ema atu iha asesu ba moris nakonu, ba ksolok ne’ebé la nahas.
Evanjellu aprezenta mai ita istória ida konfrontu nian entre “Maromak nia sabedoria” ho “mundu nia sabedoria”. Jezús nakonu ho Maromak nia lójika, dispostu atu aseita Aman nia projetu no halo nia vida don ida domin nian ba ema sira; eskolante sira, nakonu ho lójika mundu nian, iha difikuldade atu komprende opsaun ne’e no kompromete an ho projetu ida-ne’e. Maski nune’e, Jezús aviza sira katak, ba sira ne’ebé rona Maromak nia dezafiu no aseita halo sira-nia vida servisu ba maun-alin sira, liuliu ki’ik sira, haraik-an sira, kiak sira, mak hetan fatin iha komunidade sarani.
Leitura daruak ezorta fiar-na’in sira atu moris konforme “Maromak nia sabedoria”, basá nia de’it maka bele lori ema ba enkontru ho moris nakonu. Nia kontráriu, vida ida tuir kritériu sira “sabedoria mundu nian” sei hamosu violénsia, divizaun/diskórdia sira, konflitu sira, ksolok-laek, mate.
Leitura dahuluk fó hanoin katak hili “Maromak nia sabedoria” provoka mundu nia rai-kunan. Biar nune’e, taterus la bele dezanima sira ne’ebé hili “Maromak nia sabedoria”; persegisaun maka konsekuénsia naturál husi koerénsia moris nian.
