Dili – Iha tinan 2013 Inspetoria FMA Tin halo tinan 25 no fó misionária na’in rua ba Institutu. Ida mak Ir Fernanda Kalçona no ida fali mak Ir Ursula Guimarães. Nia hahú bá misaun iha tinan 2014 iha Brasil no oras-ne’e mai Timor atu vizita família, basá bainhira nia mama mate iha fulan Juñu 2015 nia labele mai.
Durante retiru anuál FMA sira-nian iha loron hirak ne’e, nia fahe uitoan ninia esperiénsia misionária tinan 1 ho balun iha Mato Grosso, Brasil.
«Ha’u agora misionária iha Cuaibá-Mato Grosso Brasil, iha Inspetoria Nossa Senhora da Paz. Irmán sira hamutuk na’in 59 no uma sira hamutuk 12.
Ha’u hela iha komunidade S. Marcos, Irmán na’in 3 no voluntária ida. Iha mós SDb sira nia komunidade.
Ami hala’o vizita semana tomak, husi segunda-domingu ne’ebé ami hanaran “semana itinerância”. Durante vizita iha Missa, katekeze ba katekúmenu sira, oratóriu, formasaun ba foin-sa’e feto sira, ‘pastoral das crianças’, traballu manuál ba inan sira, vizita ema moras sira.
Misaun ne’e bele realiza hodi rona ema, serbisu hamutuk entre FMA, SDB no kolaboradór/a sira. Basá Maromak bolu ita hotu atu moris no serbisu hamutuk atu hahí Na’i nia naran. Ne’e mak elementu esensiál ita-nia vokasaun nian (Konst.49).
Segredu ida-ne’ebé mak fó ksolok mai ha’u iha vida konsagrada nu’udar FMA no misionária? Nia abut mak ha’u-nia relasaun intimidade nian ho Jezús nu’udar ha’u-nia “esposo”. Buat ne’ebé hametin ha’u-nia ksolok iha vokasaun mak liafuan husi Evanjellu Mt 19, 29: “Ema hotu ne’ebé husik uma, maun, alin, feton, aman, inan, oan sira ka rai, tan Ha’u-nia naran sei simu dala atus ida liután hodi simu mós nu’udar liman-rohan mori srohan-laek”. Bainhira ha’u sei foin-sa’e ho tinan 19, ha’u lee tiha Jezús nia liafuan ida-ne’e, ha’u rai didi’ak iha ha’u-nia fuan laran, tan ida-ne’e mak fó naroman beibeik mai ha’u atu hili duni ha’u-nia dalan hodi tuir Nia. To’o ohin loron ha’u reflete katak renúnsia la’ós atu lakon maibé tan domin ba Jezús no domin ba maun-alin sira, no ha’u sei hetan prémiu boot iha rai ne’e ona no iha lalehan. Segredu seluk ne’ebé fó ksolok mai ha’u nu’udar FMA no misionária mak husi relasaun di’ak iha komunidade ho Irmán sira no maun-alin Salezianu sira no em ahotu hasoru iha misaun».
