Dili 10 Novembru 2016
Irmán doben sira,
maski fulan misionariu hotu ona, imi hatene katak ita-nia Institutu prepara an atu selebra 140° espedisaun misionária dahuluk nia aniversáriu.
Iha Sirkulár 964, Madre Yvonne hakerek: “Ita sei prepara daudaun atu selebra tinan 140 husi FMA sira nia espedisaun misionária dahuluk (14 novembru 2016 – 14 novembru 2017) hodi hahi’i Na’i ba di’ak wa’in ne’ebé ita-nia irmán sira kuda iha mundu tomak. Furak tebes, se preparasaun ida ne’e sei hamoris fali “impulsu misionáriu maka’as” (kf Konst 1), ne’ebé karakteriza hori uluk kedas ita-nia Institutu, iha irmán ida-idak nia fuan, iha foin-sa’e sira no iha membru hotu komunidade edukativa nia fuan. Hafoun ida ne’e halo ita la’o hamutuk ho hilin sira Kreda nian, ne’ebé misionária tan ninia natureza rasik, no Kapítulu Jerál XXIII nian. Ha’u konvensida katak ida ne’e sei hafanu mós vokasaun foun sira ba Kreda, ba ita-nia Institutu no ba Família Salesiana.”
Iha ninia surat ba selebrasaun ida ne’e, sr. Alaide ko’alia kona-ba ESPEDISAUN MISIONÁRIA BOOT hodi envolve komunidade edukativa sira, grupu misionariu sira, Infansia Misionária no konvida ita atu ita iha fuan no neon nakloke hodi hafanu ahi no dinamizmu Da mihi animas coetera tolle nian. Husi Sentru sira haruka ona proposta atu hahú selebra aniversariu ida ne’e (imi sei hetan iha attach) no iha tinan nia laran, liuliu loron 14 fulan ida-idak nian, sira sei haruka materiál ruma ne’ebé bele hametin ita-nia entusiazmu ba Jezús nia misaun.
Iha ita-nia Programasaun mós, hilin datoluk ko’alia kona-ba “misionária esperansa no ksolok nian”, tan ne’e, tinan ne’ebé sei mai bele tulun ita atu sai fiel liután ba ita-nia hilin no Madre nia konvite sai dezafiu ida atu la moris “iha sofá”, hanesan Amo Papa Francisco hateten ba foin-sa’e sira iha Krakovia.
Hanesan imi rona ona, Inspetoria iha projetu atu loke komunidade foun ida tan iha Indonesia – Sumba: tinan ida ne’e, ne’ebé ita hanoin oinsá ita-nia Institutu ho aten-barani hatán ba dom Bosco nia proposta hodi hanoin ba “klamar barak ne’ebé sei hamrook ba roman, lialoos no moris rohan laek”, interpela ita atu banati tuir ita-nia irmán dahuluk sira-nia ain fatin. Hodi selebra tinan 140, ita sei prepara an ba abertura komunidade foun ida no ita sei hamanas ita-nia hakarak atu ba haklaken Maromak nia Reinu iha ne’ebé ema presiza liu no Kreda husu. Tan ne’e, ha’u propoin katak komunidade ida-idak hahú tau intensaun espesifika ba komunidade foun ida ne’e iha Sumba ho orasaun ida ne’ebé reza ona; hafoin, bainhira diretora sira sei halibur hamutuk, sira sei hili orasaun hanesan, tanba, tuir buat ne’ebé Madre Jerál dehan durante ami-nia retiru katak, bainhira ita hamutuk, ita-nia forsa maka’as liutan.
No mós ha’u konvida irmán ida-idak atu kontinua hala’o ho entusiazmu no domin tomak buat ne’ebé Maromak entrega ona iha ninia liman: se imi ida sente katak Maromak bolu nia atu husik nia rain rasik no loke fuan ba ema seluk (bele iha kontinente seluk ka bele mós iha Indonesia; bele juniores ka perpetua sira), ida ne’e mak momentu loos atu ko’alia ho ha’u no atu dixerne hamutuk. Ha’u hein katak, liuhusi ida-idak nia empeñu, ema barak (liuliu labarik no foin-sa’e sira) bele hasoru no hadomi liutan Jezús.
Hamutuk, ita prepara didi’ak selebrasaun tinan 140 espedisaun misionária nian no abertura uma foun nian iha Sumba.
Ho domin,
Ir Alma Castagna
