Venilale – Loron rua ne’e Venilale iha festa: 29 no 30 Janeiru 2017. Atu komemora tinan 25 Pre-aspirantadu salezianu Beatu Filippo Rinaldi Venilale, Antigu alunu sira halibur hamutuk ba loron rua hodi agradese Maromak edukasaun ne’ebé sira simu iha koléjiu salezianu ne’e.
Antigu alunu husi pre-aspirantadu ne’ebé loke iha tinan 1990, hamutuk liu rihun ida ona. Entre sira-ne’e balun sai amlulik, balun sai leigu komprometidu hodi sai masin no roman iha sosiedade. Sira hatudu sira-nia gratidaun hodi harí monumentu rekordasaun nian estátua Beatu Filippo Rinaldi nian. Molok mai Venilale, sira hala’o ona selebrasaun ruma iha Dili, hodi prepara ba eventu ne’e.
Estátua ne’e sira lori horisehik no foin-sa’e no sarani Venilale sira simu ho serimónia dadolin, dansa, hananu no orchestra. Partisipa iha serimónia resesaun foin-sa’e sira husi aspirantadu FMA, Orfanatu S. Domingos Sávio, alunu sira pre-aspirantadu beatu Filippo Rinaldi no estudante sira husi eskola sekundária katólika no públika, nune’e mós Família Saleziana prezente iha Venilale. Alunu/a sira husi eskola S. Pedro Dili hamutuk ho Pe. Adérito Costa mós mai, nune’e mós artista Timor-Leste balun atu anima iha kalan konvíviu nian.
Simu tiha estátua, kontinua kedas ho prosisaun ba Pre-semináriu no hafoin halo velada orasaun. Hanesan hateten ona, iha kalan iha konsertu aprezenta husi orchestra S. Pedro no artista TL nian.
Iha domingu, selebrasaun hahú ho Eukaristia no hafoin iha mós inaugurasaun no bensan monument dedika ba Beatu Filippo Rinaldi. Ih domingu ne’ebé liturjia konvida atu moris rahun-di’ak evanjéliku, amu selebrante, Pe. Apolinário Neto, provinsiál SDB ITM nian, konvida atu hotu-hotu halo dalan santidade ida-ne’e iha ksolok, hanesan Don Bosco hanorin, hodi supera susar no terus hotu ho korajen.
Ba povu Venilale, harii pre-aspirantadu salezianu iha Venilale mak grasa ida ne’ebé mai husi Maromak nia laran-luak no resposta husi povu Venilale rasik hodi oferese rai ba estabelesimentu ne’e, ne’e mak liafuan husi mestre Aleixo rasik iha ninia liafuan sira memória nian. Venilale oan sira konvida atu antigu alunu sira ne’e mai fali iha fulan Agostu bainhira sei selebra festa tinan 25 harii parókia Venilale.
