Dili – Iha loraik 22 Outubru 2019, iha komunidade Beata Eusebia Palomino, Ir. Maria Luisa Miranda Konselleira Jerál ba Família Saleziana, akompaña husi Provinsiál Ir. Alma, hasoru grupu ADJA (ADMA Junior) hamutuk ho delegada Ir. Maria Brigida. Grupu ADJA simu Ir. Maria Luisa ho dansa kultura. Hafoin prezidente ADJA, Elsa, aprezenta sira sira-nia grupu no atividade sira hotu ne’ebé hala’o nu’udar ADMA Junior liuhusi ppt.
Iha sorumutu ne’e, Ir. Maria Luisa fó nia konferénsia ba grupu ADJA hodi esplika ba sira katak ADJA hola parte ba ADMA. Nune’e importante liu tenke koñese Don Bosco nia mehi kona ba «Koluna Rua». Mehi ne’e importante liu. Don Bosco dehan atu la’o iha dalan fiar nian presiza: Domin ba Na’i-Feto Ausiliadora no domin ba Eukaristia. Elementu rua ne’e mak sai abut ba ADMA, ne’ebé kada membru ADJA tenke hatene no komprende didi’ak.
Ir. Maria Luisa esplika kle’an liután katak ADJA la’o hamutuk ho ADMA no mós ho Pastorál Juveníl. Buat ne’ebé importante liu, mak tulun malu no la’o hamutuk iha dalan Santidade juveníl. ADJA nia dalan moris nian tuir Na’i-Feto nia virtude sira hanesan
- Rona Maromak Nia Liafuan
- Halo hanesan Nai Feto: Rona no moris tuir Evanjellu
- Hakbesik Sakramento Rekonsiliasaun no Eukaristia
- Servi ema ne’ebé presiza tulun.
Kritériu atu halo parte grupu ADMA Juvenil hahú husi tinan 14 to’o tinan 20.
ADMA no ADJA iha objetivu ida de’it: Domin boot ba Na’i-Feto no Domin boot ba Eukaristia.
ADJA hola parte ba Pastorál Juveníl, maibé iha relasaun ho imi-nia família sira. ADJA dedika loron 24 kada fulan ba Maria. Hala’o atividade karitativa di’ak, maibé keta husik elementu importante liu: tenke hatene didi’ak Regulamentu ADMA nian. Nu’udar ADJA tau matan mós ba ADJA kiik-oan sira ne’ebé imi hasoru iha imi-nia apostoladu. Nu’udar knaar esensiál mak tulun no hanorin labarik sira aprende reza Rozáriu no hadomi Na’i Feto. Buat ne’ebé importante Na’i Feto tulun imi atu sai santu no santa liu husi: Rona, Asaun no Formasaun.
Nu’udar ADMA Junior dezafiu ohin loron nian mak aprezenta moris santidade nian ne’ebé furak, ba imi nia kolega sira. Hanesan iha Família Saleziana iha modelu barak santidade foin-sa’e sira.
Nu’udar Konselleira ba Família Saleziana, Ir. Maria Luisa ezije ba Ir. Maria Brigida nu’udar animadora, ba prezidente grupu ADJA no mós ba ADMA junior sira, katak importante liu formasaun, molok halo promesa, aprende didi’ak no koñese Regulamentu ADMA nian.
Molok remata soru-mutu ne’e, Ir. Maria Luisa konvida ADMA Junior sira, atu iha domin boot ba Maria Auxiliadora. No nia hatutan: “Iimi sei sai buras liután no konkretu liután liuhusi formasaun. Imi halo buat barak furak, buat ne’ebé presiza halo di’ak liután mak formasaun kontínua”. Hafoin Konselleira Jerál ne’e, fo ba ADJA ida-idak imajem Na’i-Feto nian.
ADJA sira haksolok no hato’o obrigada wain ba Ir. Maria Luisa ba Liafuan no prezensa.
(Komunidade Eusebia Palomino)
