Iha Jezús nia batizmu iha mota Jordão, Maromak revela nia Oan-Mane doben, ne’ebé Nia haruka mai mundu ho misaun atu salva no liberta ema sira. Hodi kumpre Aman nia projetu, Nia sai ida hanesan ita, fahe ita-nia frajilidade no umanidade, liberta ita husi egoízmu no salan no empeña An atu promove ita, atu ita bele to’o ba moris iha plenitude.
Leitura dahuluk haklaken “Atan” misteriozu ida, Maromak hili no haruka ba ema sira atu lori justisa no dame rohan-laek… Ho Espíritu Maromak nian, nia sei konkretiza ho haraik-an no simplisidade, hodi la uza podér, impozisaun, prepoténsia, tanba buat sira-ne’e la tama iha Maromak nia eskema sira.
Iha Evanjellu, mosu konkretizasaun promesa profétika: Jezús mak “Oan-Mane/Atan” ne’ebé Aman haruka, no iha Nia Espíritu horik bá no Ninia misaun mak realiza ema sira nia libertasaun. Hodi obedese ba Aman, Nia sai ema, identifika An ho ema sira nia frajilidade, la’o iha sira nia sorin, atu promove sira no lori ba rekonsiliasaun ho Maromak, ba moris nakonu.
Leitura daruak afirma fali katak Jezús mak Aman nia Oan-Mane doben ne’ebé Nia haruka mai mundu atu konkretiza projetu salvasaun nian; tanba Nia “la’o iha mundu hodi halo di’ak” no liberta ema sira ne’ebé iha opresaun. Ne’e sasin ne’ebé eskolante sira tenke fó, atu salvasaun ne’ebé Maromak oferese to’o ba povu hotu rai nian.
