Iha Domingu I Tempu Kuarezma nian, liturjia garante ita katak Maromak iha interese atu harahun mundu tuan egoízmu no salan nian no oferese ba ema sira mundu foun moris nakonu no ksolok rohan-laek.
Leitura dahuluk mak estratu ida husi istória dilúviu/rai-nabeen nian. Istória ne’e hateten mai ita katak, Jahwéh, depoizde elimina salan ne’ebé halo ema sai atan no halo mundu dodok, mai hasoru ema, no halo ho nia Aliansa inkondisionál ida dame nian. Maromak nia hahalok ne’e atu hamosu umanidade foun ida, ne’ebé la’o tuir dalan domin nian, justisa nian, moris loos nian.
Iha Evanjellu, Jezús hatudu mai ita katak hakribi dalan sira egoízmu no salan nian no aseita Maromak nia projetu mak hamosu mundu foun ne’ebé Maromak hakarak oferese ba ema hotu (“Maromak nia Reinu”). Jezús husu ba ninia dixípulu sira konversaun no adezaun ba Liafoun Di’ak ne’ebé Nia rasik mai propoin, atu sira bele halo parte komunidade “Reinu” nian.
Iha leitura daruak, autór Surat dahuluk Pedro nian fó hanoin katak, liuhusi Batizmu, sarani sira adere ba Kristu no ba salvasaun ne’ebé Nia mai oferese. Sira kompromete an atu tuir Jezús iha dalan domin nian, servisu nian, saran moris nian; no, hodi envolve an iha dinamizmu moris no salvasaun ne’ebé suli husi Jezús, dixípulu sira sai prinsípiu/inísiu umanidade foun ida nian.
