Iha inísiu Kuarezma nian, Maromak nia Liafuan husu ita atu hanoin fali ita-nia opsaun moris nian no hola konxiénsia kona-ba “tentasaun” sira ne’ebé impede ita atu hahú fali moris foun iha Maromak.
Leitura dahuluk konvida ita atu elimina maromak falsu sira ne’ebé dala ruma ita halo buat hotu atu serví sira, hodi halo Maromak sai ita-nia referénsia fundamentál. Nia alerta ita kontra tentasaun foti-an no autosufisiénsia nian, ne’ebé lori ita iha dalan egoízmu no dezumanidade nian, desgrasa no mate nian.
Evanjellu aprezenta mai ita katekeze ida kona-ba Jezús nia opsaun sira. Lucas sujere katak Jezús rekuza ho modu radikál dalan ida materializmu nian, podér nian, susesu/ézitu fasil nian, basá Maromak nia planu la liu husi egoízmu, maibé husi partilla; la liu husi autoritarizmu, maibé husi servisu; la liu husi manifestasaun espetakulár ne’ebé impresiona masa/ema lubun boot, maibé proposta ida vida nakonu nian, aprezenta ho simplisidade no domin. Ida-ne’e mak dalan ne’ebé Jezús sujere ba sira ne’ebé tuir Nia.
Leitura daruak konvida ita atu husik atitude arrogante/foti-an nian no autosufisiénsia nian iha relasaun ho salvasaun ne’ebé Maromak oferese: salvasaun la’ós konkista ida ita-nian, maibé don gratuitu Maromak nian. Nune’e, presiza “konverte an” ba Jezús, katak, rekoñese Nia nu’uda “Na’i” no simu ho laran salvasaun ne’ebé, iha Jezús, Maromak propoin mai ita.
