Dili – Iha kalan 1 Marsu 2022 nian, foin sa’e lubuk ida ne’ebé mai husi Oratorianu sira, Animadór/a, Aspirantes Salesianos, Novisa FMA, hamutuk ho Salesianos Cooperadores, FMA no SDB sira halo orasaun hamutuk iha Parókia Maria Auxiliadora atu husu Dame ba mundu liuliu iha Ukraina. Asaun ne’e nu’udar lia-hatán ida ba apelu ne’ebé Santo Padre hato’o mai ita atu hamutuk halo orasaun no jejún ba Ukraina no mundu. Orasaun hahú ho tutan papél ki’ik sira sai korrente símbolu dame nian, hafoin haree video badak kona ba situasaun iha Ukraina, prosisaun ba igreja laran no adorasaun Santíssimu Sakramentu.
Ita ho fiar hakarak kontra buat aat ne’ebé mosu dadaun iha Ukraina ho ita nia kilat orasaun no adorasaun nian. Nu’udar maun/biin-alin ita hakarak atu tristeza hotu kona-ba funu, violénsia no ódiu bele hetan dalan dame nian ba ema ida-idak, ba nasaun sira hotu liuliu Ukraina. Ita ho fiar harohan ba ita nia maluk sira hotu ne’ebé terus iha funu ida ne’e no tempu hanesan ita reza ba ukun-na’in Rusia nian, atu Maromak book sira nia fuan no bele mosu hakaran atu hapara lalais funu ida-ne’e hodi husik ema hotu moris iha hakmatek nia laran.
Iha audiénsia 23 Fevereiru 2022 Papa Francisco apela nune’e: “Ha’u nia fuan iha terus boot ba situasaun iha Ukraina. Maski servisu diplomata barak halo ona iha semana ikus ne’e, maibé situasaun kontinua sai aat. Ema barak iha mundu tomak sente terus no preokupadu tebes. Dala ida tan PÁS HETAN AMEASA. Ha’u hakarak apelu ba sira ne’ebé iha responsabilidade polítika atu ho sériu halo ezame konxiénsia nian iha Maromak nia oin, katak Maromak mak Maromak Pás nian la’ó funu nian. Nia ne’ebé Aman ba ema hotu, la’ós ba ema ruma de’it, ne’ebé dezeja tebes ita nu’udar maun-alin la’ós nu’udar inimigu ba malu”.
Ita mak ajente Pás nian, ita bele halo buat ruma atu kria paz iha fatin hotu ne’ebé ita liu. Ho orasaun, jejún no karidade ne’ebé hahú aban ita sei hala’o, ita oferese ba dame iha fatin hotu ne’ebé sei funu.
(Noemia de Deus FMA)
