Leitura sira domingu datoluk Adventu nian garante ita katak Maromak soi projetu ida salvasaun no moris nakonu nian atu propoin ba ema sira no atu halo sira sai husi “nakukun” ba “naroman”.
Iha leitura dahuluk, profeta pós-ezíliku ida aprezenta nia an ba makhorik sira Jerusalém nian ho “liafoun-di’ak” ida Maromak nian. “Profeta” ne’ebé Espíritu hili, nia misaun mak haklaken tempu foun, moris nakonu no ksolok rohan-laek, tempu ida salvasaun nian ne’ebé Maromak sei oferese ba “ema kiak” sira.
Evanjellu aprezenta ma ita João Batista, “lian” ne’ebé prepara ema sira atu simu Jezús, mundu nia “naroman”. João nia objetivu la’ós atu foka públiku nia atensaun iha nia an; nia iha interese ida de’it: atu lori ninia interlokutór sira atu simu no “koñese” Jezús, “ida-ne’ebé” Aman haruka ho proposta ida vida definitiva no liberdade tomak nian ba ema sira.
Iha leitura daruak Paulo esplika ba sarani sira komunidade Tessalónica nian atitude ne’ebé presiza asume enkuantu hein Na’i ne’ebé mai… Paulo husu ba sira atu sai komunidade ida “santa” no sala-laek, katak, moris haksolok, iha hahí no adorasaun, nakloke ba don sira Espíritu nian no ba dezafiu sira Maromak nian.
