Liturjia Domingu V Páskua nian konvida ita atu reflete kona-ba ita-nia uniaun ho Kristu; no dehan mai ita katak hodi hamutuk de’it ho Kristu mak ita iha asesu ba moris loos.
Evanjellu aprezenta Jezús nu’udar “ai-videira loos” ne’ebé fó fuan di’ak Maromak hein; nia konvida eskolante sira atu sai ida de’it ho Kristu, basá husi Nia mak sira simu moris nakonu. Sira horik ho Kristu karik, dixípulu sira sei sasin loos iha ema sira nia leet kona-ba moris, domin no Maromak.
Leitura dahuluk dehan mai ita katak sarani ida mak membru isin ida nian – Kristu nia Isin. Sarani nia vokasaun mak tuir Kristu, integra an iha família maun no biin-alin sira nian ne’ebé partilla fiar hanesan, hodi la’o hamutuk tuir dalan fiar nian. Iha diálogu no iha partilla ho maun no biin-alin sira mak ita-nia fiar moris, sai buras no sai tasak no iha komunidade liga malu ho lasu domin no fraternidade nian, mak ita-nia vokasaun bele realiza loloos.
Leitura daruak define sai sarani nu’udar “fiar iha Jezús” no “hadomi malu hanesan Nia hadomi”. Ne’e mak “fuan sira” ne’ebé Maromak hein husi ema hotu ne’ebé sai ida de’it ho Kristu, “ai-videira loos”. Ita pratika hahalok domin nian karik, ita iha serteza katak ita sai ida de’it ho Kristu no Kristu nia moris sirkula iha ita.
