Liturjia Domingu VI Tempu Komún nian aprezenta mai ita Maromak ida nakonu ho domin, laran-di’ak/bondade no ternura, ne’ebé konvida ema hotu, feto no mane atu integra iha komunidade Maromak nia oan doben sira-nian. Nia la ezklui ema ida no la aseita katak, hodi nia naran, inventa sistema diskriminasaun eh marjinalizasaun maun-alin sira-nian.
Leitura dahuluk aprezenta mai ita lejizlasaun ne’ebé define forma atu trata ho ema moras-lepra sira. Ita haree oinsá husi ilas laloos Maromak nian ne’ebé ema sira iha, sira inventa mekanizmu sira diskriminasaun no rejeisaun hodi Maromak nia naran.
Evanjellu dehan mai ita katak, iha Jezús, Maromak tuun mai hasoru nia oan sira vítima rejeisaun no ezkluzaun nian, laran sadia ba sira, lolo liman ho domin ba sira, liberta sira husi sira-nia terus, konvida sira integra an iha komunidade “Reinu” nian. Maromak la halo moruk ho diskriminasaun no denunsia nu’udar kontráriu ba Ninia projetu sira mekanizmu hotu opresaun nian hasoru maluk sira.
Leitura daruak konvida sarani sira atu soi nu’udar prioridade Maromak nia glória no maluk sira nia servisu. Ezemplu aas liu mak Kristu, ne’ebé moris obediénsai inkondisionál ba Aman nia projetu sira no halo nia moris sai don ida domin nian, atu lori ema sira nia libertasaun.
