Liturjia Domingu da-XI Tempu Komún nian konvida ita atu hateke ba moris ho konfiansa no esperansa. Maromak, fiél ba ninia planu salvasaun nian, kontinua ohin no nafatin atu lori ema nia istória ba meta ida moris nakonu no ksolok rohan-laek nian.
Iha leitura dahuluk (Ez 17,22-24), profeta Ezequiel asegura Maromak nia Povu, ne’ebé desterra iha Babilónia, katak Maromak la haliha ninia Aliansa, la haluha mós promesa sira halo iha tempu uluk. Maski mosu akontesimentu oioin, dezastre no krize sira ne’ebé hola parte iha istória, Israel tenke kontinua konfia iha Maromak ne’ebé fiél no la deziste atu oferese ba nia Povu futuru ida hakmatek nian, justisa no dame rohan-laek.
Evanjellu (Mc 4,26-34) aprezenta mai ita katekeze ida kona-ba Maromak nia Reinu – realidade foun ne’ebé Jezús mai atu haklaken no propoin. Ida-ne’e maka projetu ida, ne’ebé se hateke ka tetu ho lójika umana, parese katak nia sei la hetan susesu; maibé iha nia soi Maromak nia dinamizmu no nia sei to’o ba mundu no fuan hotu. Lahó tarutu, lahó ansi, lahó publisidade, fini/musan ne’ebé Jezús kari sei halo atu realidade tuan ne’ebé ita koñese, neineik-neineik, sei husik fatin ba lalehan foun no rai foun ne’ebé Maromak hakarak oferese ba ema hotu.
Leitura daruak (2 Cor 5,6-10) fó hanoin mai ita katak moris iha rai-ne’e, ne’ebé marka ho finitude no tranzitoriedade katak loron ida sei hotu, tenke moris nu’udar peregrinasaun ida ba hasoru Maromak, ba moris definitivu. Sarani tenke konxiente katak Maromak nia Reinu (ne’ebé Evanjellu ohin nian temi), biar iha ona ita-nia dalan atuál istória nian, sei atinje ninia maturasaun nakonu iha tempu nia rohan, bainira ema hotu feto no mane sira sei tuur iha Maromak nia meza no simu husi Maromak moris ne’ebé la nahas. Ita hotu tenke hateke ba ne’ebá no la’o ba ne’ebá, ne’e maka vizaun ne’ebé tenke anima ita-nia la’o-rai.
