Liturjia Domingu da-23 ko’alia mai ita kona-ba Maromak ida ne’ebé kompromete an ho ema-nia vida no ksolok, buka nafatin atu hafoun, kria fali ema, atu nia bele atinje vida nakonu Ema Foun nian.
Iha leitura dahuluk, profeta ida époka ezíliu iha Babilónia nian garante ba desterradu sira, hoku iha sira nia terus no dezesperu, katak Jahwéh besik atu mai hasoru nia Povu atu liberta nia no lori fali nia ba nia rain. Iha ilas sira ema matan-delek sira ne’ebé haree fali naroman, ema tilun-diuk sira rona ne’ebé rona fali, ema ain-kude’ik sira sei haksoit hanesan rusa no ema monok sira hananu ho ksolok, profeta aprezenta vida foun ne’e ida nakonu, naresin, transformadora ne’ebé Maromak hakarak oferese ba Judá.
Iha Evanjellu, Jezús, hodi kumpre mandatu ne’ebé Aman konfia ba Nia, Nia loke ema ida ne’ebé diuk nia tilun no kore nia nanál… Iha Jezús nia jestu ida-ne’e, bele haree katak Maromak la husik ema taka an iha ninia egoízmu no autosufisiénsia, nune’e rejeita domin, partilla, komuñaun. Enkontru ho Kristu lori ema atu sai husi ninia izolamentu no estabelese lasu familiár ho Maromak no ho maun-alin sira hotu lahó esesaun.
Leitura daruak dirije ba sira ne’ebé simu Jezús nia proposta no kompromete an atu tuir Nia iha dalan domin nian, partilla nian, saran-an nian. Konvite ida atu keta diskrimina ka hasees naran maluk ida no simu ho laran-di’ak espesiál sira ne’ebé ki’ik no kiak.
