Fuiloro, 01 Fevereiru 2020, iha dader enkontru ba aman inan menina kolejiu sira nian, ne’ebe oan sira hamahan an iha kolejiu Morano ne’ebe hamutuk 116 pesoas (Eskola Teknika Agricula/ ETA = 58, Kursus Computer hamutuk 54 e Kursu suku 4). Iha enkontro ida ne’e inan aman sira kuaze prezente hotu iha enkontru ne’e.
Objetivu husi enkontru dahuluk ne’e mak aprezenta Regulamentu Kolejiu nian ba Familia atu hatene, nune’e bele kolabora hamutuk ho Irmã sira, ba oan sira nia susesu aprendizajen nian. Molok atu tama ba aprezentasaun Regulamentu, Irmã Ermelinda Gomes, FMA nudar Directora da Casa aprezenta ba inan Aman sira kona ba Estreia Reitor Mor tinan 2020 nian “Sai sarani diak no sidadaun Onestu” liu husi video badak ne’ebe simplis maibe forte ho ninia kontiudu sira.
Haree ba kontiudu iha parte dahuluk nian koalia kona ba bibi ida ne’ebe lakon, bibi atan ba buka to’o hetan. Hare ba parte edukadora nian bele hanorin lisaun boot mai ita inan Aman ou responsavel ba oan sira katak, ita ida-idak tebes duni preokupa ho oan sira nia vida Sarani no moral ne’ebe ohin loron mundu desafia hela ita.
Haree ba kontestu ne’ebe ita enfrenta mak foinsae sira oras ne’e barak mak hela iha kolejiu. Inan aman sira nia espetativa mak hein katak oan sira sei sai diak iha futuru ne’ebe mai, maibe presisa kolaborasaun no serbisu hamutuk ba oan sira nia edukasaun integral, katak eduka sai ema sarani diak e sidadaun onestu iha mundu ohin.
Topiku tuir mai mak aprezenta Regulamentu Kolejiu & sansaun iha tinan 2020 nian. Hare hamutuk mos kona osan kolejiu nian nia gastu sira no mos esplika klaru no detail ba inan aman sira atu komprende didiak oan sira nia nesesidade iha kolejiu laran.
Ikus mai taka ho merenda hamutuk nudar familia ida deit iha Kristu.
(Ir Ines Bartolo Freitas)
