Iha Loron 27 Janeiro, iha Komunidade Laga, Irmán Perpetua sira hamutuk 23 husi Komunidade Zona Leste no Indonesia halao enkontru ho Me. Assunta, Konsilleira Vizitadoria nian, ne’ebé mai halo vizita badak ba FMA sira iha Timor-Indenesia (TIN).
Iha enkontru ne’e Madre fo hanoin ba Irmán sira atu mantein nafatin moris laran manas mehi dahuluk nian hodi hare iha ne’ebé no oinsa Maromak interpela ita. Hare ba kontestu ita nia moris nian hodi hare oinsa Maromak realiza mehi ne’ebé Nia iha ba ita. Ita nia “Ser” mak importante, laos servisu be ita halo. Nune’e fiar didiak katak hau nia prezensa deit sei salva foinsa’e sira. Laos hau maibe Salvasaun liu husi hau nia saran-an bele salva foinsa’e sira. Espiritu Santo mak bolu ita no sai protagonista. Tamba ne’e futuru la depende ba ita, Jesus mak futuru no esperansa. Ita sai prezensa kriativa no aten brani hodi lori ba oin karisma ne’ebé moris nafatin tamba nia mak Espíritu Santo nia Dom. Ita simu responsabilidade atu dezenvolve iha ne’e, iha Timor-Indonesia. Dezenvolve iha ksolok Evanjellu nian, katak halo tuir Evanjellu uluk. “Maromak manifesta-An ba ita tuir dalan”. Fiar ba katak buat ne’ebé ita halo maski ki’ik, Maromak sei realiza nia tuir Maromak Nia hakarak.
Hotu tiha Madre nia konferensia badak, fahe esperiensia iha grupo ki’ik, Irmán balu fahe sira nia esperiensia, almoço hamutuk no fahe malu. Ida-idak ba nia Komunidade. Obrigada Irmán sira iha Komunidade Laga ba akollensa, fatin no hahan meio-dia nian. Maromak sei rekompensa.
(Noemia de Deus, FMA)
