Kailaku – Iha loron 16/09/2020, Kuarta-Feira, formande sira (Postulante nain 5 no Novisa nain 5) hamutuk ho Madre nain 4: Me. Esmeralda (Maestra Novisa), Me. Ermelinda (Asistente Novisa), Me. Evangelina (Diretora Uma formasaun Postulante) no Me. Armenia (Asistente Postulante) viajen ba iha Cailaco atu hala’o esperiensia karitativa iha fatin balun ne’ebé hili tiha ona. Depoizde to’o iha Kom. Me. Romero-Cailaco, lokraik kontinua kedas viagem ba iha suku Genulai (Viagem ho kareta oras 3 no la’o 45 min). Akollensa ne’ebé nakonu ho domin ami sente husi sarani sira hotu no liuliu uma nain Mestre Jose ne’ebé simu ami iha nia uma. Atividade ne’ebé ami hala’o mak reza Tersu no Velada hamutuk ho sarani sira hafoin entrega Estatua Maria Auxiliadora nian ba iha Kapela Suku Genulai nian. Sentimentu gratidaun no ksolok nian espresa husi sarani sira hotu ne’ebé hola parte iha Suku ne’e, Katekista Sr. Sabino hateten “ita agradese ba Maromak tamba baibain ita hare deit mak Nainfeto nia imajen maibe ohin kalan nia isin mak mai prezente iha ita nia leet”.
Atividade kontinua iha loron 17/09, Kinta-Feira ho vizita familia ida-idak, reza ho sira no fahe sasan oituan ne’ebé lori husi Kom. Me. Romero, iha lokraik ami fila-fali ba Kom. Me. Romero. Iha loron 18/09, Sesta-Feira dader, ami fahe malu ba grupu rua (Post. no Nov.) hodi vizita familia sira iha Suku Purugua no Aldeia 
Gilara nian. Iha lokraik kontinua ho atividade Promosaun Vokasional ba Eskola Sekundaria iha Biadila no Grupu Akolitos sira.
Agradese wain ba oportunidade furak ne’ebé Inspetoria oferese liuhusi Ambitu Formasaun nian, ba komunidade sira no Irman sira ne’ebé suporta ami iha parte material no espiritual hodi ami bele hala’o ho diak ami nia atividade hirak ne’e to’o remata. Agradese mos ba komunidade Me. Romero Kailako ne’ebe simu ami, fo fatin no sasan sira atu ami bele realiza atividade sira ne’e ho diak. Husi esperiensia hirak ne’e hotu, halo ami korajen no laran manas liutan iha ami hilin atu saran-an ba Na’i hodi serbi Nia povu, liu husi foinsa’e no labarik sira liuliu hirak ne’ebé presiza liu no hamoris mos iha ami domin ba rai misaun. Obrigada barak.
Formande (Post. no Nov.)
