Cailaco – Iha realidade mundu ohin loron nian nu’udar FMA ita tenke kriativa iha ita nia apostoladu iha foin-sa’e no labarik sira nia leet, hodi oferese ba sira buat ne’ebé relevante tuir sira nia nesesidade. Situasaun oi-oin ne’ebé foin-sa’e sira hasoru interpela ita no sai dezafiu ida ba ita iha ita nia pastorál no sistema edukasaun. Ita hotu iha dezeju boot atu oferese ba foin-sa’e no labarik sira buat ne’ebé di’ak liu no util ba sira atu sira bele hetan futuru ne’ebé di’ak.
Pastorál juveníl iha ita nia Institutu mak asaun konkreta misaun edukativa nian. Nia finalidade mak ema nia dezenvolvimentu integrál no eduka ba empeñu sidadania ida ne’ebé ativu (Liña orientadora ba misaun edukativa FMA, pg.8).
Sensibilidade pastorál ho espiritu Da mihi animas nian dudu ita nafatin atu hola parte iha kreda nia misaun evanzelizasaun nian ne’ebé hetan nia orijinalidade iha ita nia pastorál nu’udar saleziana ho formula ne’ebé baibain ita uza “evanjeliza hodi eduka no eduka hodi evanjeliza”. Linguajen ne’e mak ami koko atu aplika iha ami nia pastorál ho foin-sa’e no labarik sira ne’ebé ami hasoru.
Kontestu ne’ebé ami hela, sensibilidade ba edukasaun minimu tebes nune’e rezulta foin-sa’e barak la eskola liu-liu hirak ne’ebé hela iha fatin izoladu sira. iha familia ida-ida ita nafatin hetan labarik ne’ebé la eskola atu bele tulun sira nia inan aman iha toos no natar. Kondisaun ne’e hamosu foin-sa’e barak ne’ebé la eskola no mos balun eskola duni maibe la remata primária no pre-sekundária.
Situasaun konkretu ida ne’e interpela ami atu oferese buat ne’ebé relevante ho sira nia nesesidade nune’e komunidade oferese kursu suku no komputador maske espasu limitadu maibe komunidade maneja orariu nune’e oferese oportunidade ba sira atu kapasita sira nia-an. Irman Teresa mak hanorin no akompaña sira ne’ebé suku no Irman Ermelinda mak hanorin komputador.
Maske ho fasilidade ne’ebé limitadu no espasu atu hala’o atividade la sufisiente maibe la hapara irman sira nia dezeju boot atu tulun foin-sa’e hirak ne’e. hein katak buat ne’ebé ita oferese sai util iha sira nia moris no ami fiar katak providensia sei la kuran ba ita atu bele tulun ema kiak sira. karidade ne’ebé ita halo sei nakfilak ba grasa no bensaun.
Aleinde ne’e komunidade utiliza espasu ki’ik ida atu oferese ba labarik sira liu hirak ne’ebé ladun hatene lee no hakerek dadeer no loraik troka malu atu mai estuda, lee no hakerek. Ami fasilita sira ho livru, kadernu, lapis no lápis-kor no dala ruma sira rasik mai ho sira nia material eskola nian.
Ita reza ba malu atu iha ne’ebé de’it mak ita hela no apostoladu saida de’it mak ita halo nafatin ho espiritu Da Mihi Animas nian no liu-liu ita nia atividades sira bele Evanjeliza hodi eduka no eduka hodi evanjeliza.
(Albina do Carmo)
