Editoriál: Tempu Kairós nian
Hateke ba esperiénsia sira ne’ebé ita moris ona (hanesan tinan 140 Institutu FMA nian), moris daudaun (preparasaun ba DB nia moris no aniversáriu da-25 FMA iha Timór) no atu mai ka tama daudaun (Tinan Fiar nian), ita labele la fó agradese ba Maromak, ba oportunidade ne’ebé Nia kontinua haraik: “Ne’e mak tempu favoravel, ne’e maka tempu salvasaun nian” (2 Cor, 6,1). Ita buka lee ho kle’an no matenek “sinál sira tempu nian” nu’udar oportunidade hotu Maromak fó mai ita ba ita-nia ksolok no salvasaun.
Iha Kristianizmu, tempu kronos (tempu kronolójiku liga ho esperiénsia profana) sai tempu kairós (tempu oportunu liga ho esperiénsia sagrada) basá Maromak enkarna an iha esperiénsia umana, maski ida terus liu, no nakfilak ba ninia grasa. Ida-ne’e maka Kairós, tempu oportunu, tempu grasa nian iha hic et nunc, ohin no iha ne’e. Maromak manifesta an iha situasaun ohin nian. Maibé infelizmente, dala barak ita tilun di’uk no ita tau ita-nia “sín” no “lae” iha fatin sala. Ita dehan sín ba maromak kronos no ita dehan lae ba Kairós katak Grasa ne’ebé lori ita ho modu absolutu ba Maromak. Maromak nia tempu (kairós) taes no kruza ema nia tempu (kronos) no nakfilak nia iha okaziaun singulár ida grasa nian.
Nune’e, konvite mai ita hotu ba leitura kle’an, ba intelijénsia sapiensiál no teologál – kairolójika no la’ós de’it kronolójika – akontesimentu sira nian. Akontesimentu hotu iha ita-nia oin labele liu de’it. Kreda nia konvite iha Tinan Fiar nian atu hakle’an no haklaken ita-nia fiar maka momentu Kairós ida ba sarani hotu, hahú husi Bispu sira, amlulik sira, relijiozu no relijioza sira, atu lori fali faxíniu Evanjellu Kristu nian ba ema tomak.
