Venilale – Iha loron kinta, 20 Agostu, Irmán sira komunidade Madre Mazzarello halo Lectio Divina hamutuk ho menina koléjiu sira nu’udar preparasaun ba festa Gratidaun Inspetoriál nian ne’ebé ho tema MAGNIFICAT – ( Lc, 1, 46 – 55 ).
Ir Jacinta Gusmão FMA aprezenta uluk testu evanjéliku, hafoin ida-idak ba iha grupu tuir asosiasaun atu reflete kona-ba Maromak nia prezensa no kmanek sira iha moris rasik. Ida-idak simu konvite atu nia Magnificat ho liafuan sira mai husi fuan pesoalmente, hafoiun nu’udar grupu. Magnificat grupu nian sei lee iha Santa Misa loron 22 “koroasaun Maria Virjen nian’, loron ne’ebé selebra Gratidaun Inspetoriál.
Iha loraik kontinua ho adorasaun ba Santísimu ho forma Taizé, hodi harohan ba nasaun Timor-Leste – iha loron FALINTIL nian – harohan ba Rai ida livre husi korrupsaun, injustisa no diskriminasaun. Foin-sa’e sira harohan, liuliu ba ukun-nain no polítiku sira atu sira la hanoin de’it an rasik hodi hariku an maibé 
hateke ba ema hotu ne’ebé moris kiak no jerasaun foin-sa’e sira; harohan mós ba Kreda atu sai roman no masin ba mundu hodi sai lian ba sira ne’ebé laiha lian; harohan mós ba foin-sa’e sira, jerasuan foun, atu ho hanoin di’ak, bele hatudu sira-nia aten-brani hodi lori mudansa ba Rai Timor- Leste.
Hafoin iha momentu Magnificat nian ema ida-idak reza ninia Magnificat hodi agradese ba Maromak ba grasa no bensaun ne’ebé simu iha moris ne’e.
MAGNIFICAT PESOÁL
“Obrigada Na’i ba iis moris nian ne’ebé Ita haraik mai ami to’o ohin loron. Liu husi ami-nia inan no aman ne’ebé akompaña ami durante ami-nia moris husi kiik to’o boot. Ami agradese Ita, Aman laran di’ak, ne’ebé tau matan ho domin mai ami, ne’ebé moris hamutuk iha espíritu Família Salesiana nian. Aman Maromak ha’u agradese Ita, tan haraik mai ha’u Espíritu Santu nia kbiit atu halo tuir nafatin Ita-nia hakarak; Hanesan Maria ne’ebé hatán “Sin” nafatin ba Na’i. Aman Maromak laran di’ak, ami agradese ba domin no ksolok, ne’ebé Ita fó mai ami, liu husi madre sira, edukadór/a sira no ema hotu ne’ebé ami hasoru” (Tania).
“Ha’u agradese no hahí Ita, Na’i ba moris Ita haraik mai ha’u, liu tiha tempu sira terus no triste nian,Ita haraik fali ksolok mai ha’u. Ha’u nia neon no fuan ha’u oferse ba Ita Boot. Ha’u agradese Na’i, ba Ita Boot nia prezensa iha Eukaristia loron-loron nian. Ha’u agradese Na’i liuliu ba madre sira no edukadór/a ne’ebé akompaña ha’u” (Zulmira).
“Ha’u klamar hahí Maromak ha’u-nia Maksoin, tan halo buat barak iha ha’u-nia moris. Ha’u hahí Maromak tan Nia laran di’ak no no laran luak na nafatin.Nia la hanoin ha’u -nia salan sira no frakeza. Maibé Nia laran sadia no perdua nafatin. Ha’u hahí Maromak tanba Nia prezensa ativa iha ha’u-nia moris. Nia prezente nafatin iha ha’u-nia komunidade, iha maluk sira no ema hotu ne’ebé ha’u hasoru iha moris loron-loron” (Ir. Olviana).
“Ha’u hahí Maromak basá Nia mak inspirador ne’ebè inspira ema barak hodi la’o ba oin maske iha susar laran. Ita halo ha’u sai kbiit laek ne’ebé presiza tebes Nia. Nia halo ha’u reflete ba sala hotu, no ha’u admira ba furak hotu ne’ebé Nia fó” (Jane Lucresia).
“Ha’u agradese ba Maromak, ba grasa ne’ebé ha’u simu loron-loron. Ha’u agradese Ita tan Ita haraik kbiit, aten barani, matenek no kreatividade ne’ebè ha’u simu. Ha’u agradese Ita liu husi orasaun no knananuk ne’ebé ha’u hasa’e. Ha’u agradese ba domin ne’ebé ha’u simu husi família” (Anicia).
“Ha’u agradese Na’i, ba rahun di’ak no bensaun wain ne’ebè ha’u simu iha ha’u-nia moris; ba domin, tulun no akompañamentu” (Erna).
“Na’i ha’u hahí Ita tan Ita halo ha’u moris iha mundu ne’e. Ha’u agradese Ita tan Ita hili ha’u tuir Ita Oan.Ita-Nia naran Santu ha’u sei hananu iha ha’u-nia moris tomak hamutuk ho foin-sa’e sira” (Ir. Alice).
“Ha’u klamar hahí Na’i basá Ita hatudu Ita-Nia laran di’ak mai ha’u. Ha’u husu buat hotu ba Ita, sempre hatán mai ha’u, liu husi kolega sira no madre sira, iha ne’eba mak ha’u kontempla Ita-Nia domin boot tebes” (Lindalva).
“Ha’u agradese Na’i ba grasa moris ne’ebé ha’u simu husi ha’u-nia família. Ha’u agradese Ita ba Benfeitór sira ne’ebé tulun ami iha ami-nia misaun” (Ir. Carolina).
