Fuiloro – Festa ba Madre Maddalena Morano ne’ebe selebra iha loron 15 Novembru sai mos loron graduasaun ba menina kursu 78 ne’ebe hamahan an iha kolejiu Madre Madalena Morano Fuiloro.
Festa ne’e hahu ho selebrasaun Eukaristia iha oras tuku 10.00 dader hafoin kontinua ho seremonia ba graduasaun.
Konvidadus ne’ebe marka presensa iha seremonia ne’e mak reprezentante Secretario Estado da SEPFOPE , Sra Isabel de Lima, Madre Vigaria Provinsial FMA, Madre Ermelinda Gomes, FMA, no mos Director/a sira kada Ministerio ne’ebe aluna sira ba halao estajiu.
Padre Antonio Transfigurasaun, SDB mak Selebra eukaristia hamutuk ho padre Mario do Rosario, SDB e Padre Carlos Fernandes, SDB.
Padre Transfigurasun nia omilia koalia kona ba Evanjellu ne’e be foti husi sao Joao 15 : 1-5 kona ba “ Hau mak uvas hun imi mak sanak sira”. Nia dehan “atu hetan fuan diak presisa metin tebes ho hun, nunee mos ita ida-idak, maibe nia fo hanoin liu-liu ba graduada sira. Moris ne’e presisa atu dezenvolve tan ne’e presissa tebes tau laran metin iha Na’I nune’e deit mak ita bele produz fuan ka rezultadu ba ita nia futuru. Maromak sai importante iha ita nia moris”.
Iha diskursu badak husi Sra. Isabel de Lima ne’ebe dehan: Centro Formasaun nee numeru sira ne’ebe hetan serbisu iha ministeriu aas liu mak mai husi Centru nee, ida nee orgullu ida ba sentru tanba ho madre sira nia esforso no mos treinadora sira mak aluna barak hetan sussesu.
Fo hanoin mos ba inan aman sira atu sai responsavel primeiru ba oan sira tanba sira kursu deit tinan ida ho madre sira maibe tempu barak hamutuk ho imi aman inan sira.
Madre Ermelinda Gomes nudar reprezentante madre Provinsial fo lia fuan badak ba aluna graduada sira katak: ohin imi sai ami nia Antigas alunas, katak imi sai ami nia kolaboradora iha ami nia misaun. Nune’e keta haluha kaer metin nafatin valores sira ne’ebe imi hetan ka aprende iha kolejiu ida nee, Valores hirak nee sai nudar bukae ne’ebe tenke lori iha imi nia moris aban bairua nian.
Iha tempu hanesan Irman Sebastiana nudar superiora komunidade nian fo hanoin mos ba sira katak: imi simu formasaun barak husi centru ne’e nudar fini diak ida ba imi nia moris hodi ba hasoru mundu serbisu nian ho dignidade ne’ebe aas hodi harii futuru ne’ebe iha kualidade. Aman inan sira tenke sai pontu referimentu ba oan sira nia kresimentu.
Seremonia graduasaun remata ho almosu hamutuk ho membrus governu no familia graduada sira.
