Hamutuk ho foin-sa’e sira ita sai misionária esperansa no ksolok nian!
Dili – Iha loron 27 Abríl loraik, uma novisiadu “S. José” derepente sai boot no nakonu ho formande sira ne’ebé mai husi Venilale no Balide, tanba sira tuir Workshop kona ba “Tinan 140 Primeira Espedisaun Misionária 1877-2017” ne’ebé sei hala’o to’o aban loron 28. Me. Luz Ruiz Stella mak prepara no fó Workshop ne’e. Partisipante sira hamutuk 27; formande sira hamutuk iha 21 (3 Pre-Aspirante, 4 Aspirante, 5 Postulante, 5 Novisia 1° ano no 4 Novisia 2° ano) no Irmán superiora husi kada uma formasaun no asistente, partisipa mós Irmán na’in rua husi Ámbitu Ad-Gentes.
Workshop ne’e hahú ho jogu “soe kabas” (lempar benang) ho objetivu koñese malu. Depois tama kedas ho orasaun abertura nian no kontinua rona mensajen husi me. Alaide Deretti (Me. Konselleira Ámbitu Misaun). Iha Me. Luz ninia aprezentasaun kona ba “Mehi Barcelona nian” tulun tebes atu hatene ita nia abut “Espiritu Misionáriu” iha ita nia Institutu. Depois formande sira ba serbisu ho “elenco” institutu nian atu buka hatene Institutu ninia presenza ne’ebé habelar iha mundo tomak. Fiél ba prátika piedade, iha loraik partisipante hamutuk ho Irmán sira husi komunidade Novisiadu reza rozáriu “Misionáriu” iha gruta oin.
Atividade loron ohin nian taka hodi halo selebrasaun “Ahi nian” iha gruta nia oin ho ojetivu atu halakan ahi (espiritu) misionáriu iha partisipante ida-idak nia fuan. Momentu ne’e akompaña ho orasaun refletivu no konvida partisipante ida-idak atu halo kompromisu misionáriu nian.
Virtude sira Irmán misionária dahuluk nian
Atu hetan kbiit foun iha loron foun, katak loron 28 Abríl, atividade sira hahú ho selebrasaun Eukaristia ne’ebé prezide husi Pe. Manuel Fraile, sdb.
Loron ne’e, me. Luz aprezenta “Primeira Espedisaun Misionária” ne’ebé hatudu oinsá Irmán misionária dahuluk ninia laran-manas, aten-brani, disponibilidade … atu lori Jezús ba ema seluk. Hotu tiha, formande sira halo atividade iha grupu hodi lee Irmán dahuluk ne’ebé ba Amérika nia-moris no buka sira nia virtude sira no husu partisipante atu aprezenta tuir grupu ida-idak ninia kriatividade (liu husi kanta ka drama badak ida).
Hotu tiha sesaun ida ne’e sira kontinua serbisu ho Madre Mazzarello ninia surat atu deskobre virtude sira ne’ebé Me. Mazzarello hakarak kuda iha FMA sira no iha kandidata sira. No iha parte ida ne’e mos husu ba formande tuir grupu etapa formasaun ida-idak nian atu halo sira nia empeñu depois aprezenta iha asembleia. Maski me. Alma Castagna (Me. Provinsiál) momentu ida ne’e iha Japaun maibé nia prezente liuhusi gravasaun hodi bele halo formande sira rona ninia mensajen.
Workshop ida ne’e remata ho han hamutuk no molok fahe malu, husi formande sira aprezenta knananuk no dansa atu agradese me. Luz ne’ebé disponivel prepara didi’ak workshop ne’e no ba komunidade Novisiadu ne’ebé simu ho di’ak partisipante sira.
Molok fahe malu, formande sira hakerek surat ba Ir Alaide Deretti atu haktuir sira-nia esperiénsia kona-ba workshop ida-ne’e.
(Veronika Kusnadi – Koordenadora Ámbitu Misaun)
