Husi Lanny Ganda/Redasaun
Bondo Kodi / Sumba (Indonesia) – Iha loron 10 Abril tinan ida ne’e marka Istoria iha rai Bondo Kodi ho prezensa Irman FMA sira nian liu husi Inagurasaun no Bensaun ba Uma husi Amu-Bispu Weetebula Mgr. Edmund Woga, CSsR. Iha okaziaun ne’e nailulik no relijiozu/a barak mak marka prezensa. Hahu ho resesaun ka simu Amu-Bispu ho dansa tradisional, hafoin Missa, Bensaun ba uma no Irman sira ne’ebe sei hela iha Komunidade ne’e no ikus taka ho serimonia konfraternizasaun. Sarani barak tebes mak partisipa iha selebrasaun ne’e, delegasaun husi Estasaun Missionaria 13 Parokia Bondo Kodi nian ,delegasaun husi Parokia Palla no delegasaun husi relijiaun protestante no musulmanu.
Iha Selebrasaun Eukaristia, iha Omilia Amu-Bispu dehan: “Ha’u halo vizita antes ona mai uma ne’e no haree katak uma ne’e prontu ona atu bele bensaun. Kompara ho uma tradisional iha Sumba, uma tenke iha kakuluk ne’ebe halo ita hateke ba leten no iha nia fundasaun metin iha rai katak iha kontaktu ho kriatura. Iha nia “bale-bale” karuk no loos katak atu lolo liman ba sorin karuk no sorin loos. Hau haree iha uma ida-ne’e iha kriteriu sira ne’e. Iha fatin atu kontaktu ho Ida ne’ebe kria no bolu ita. Iha sorin karuk no loos katak sira ne’ebe hela iha uma nia laran atu hateke ba sorin-sorin. Iha nia sentru mak Jesus ne’ebe sai forsa no bee-matan ba ita nia moris”.
Amu-Bispu dehan mos katak “eventu ne’e hakerek iha istoria parokia nian tanba kleur ona povo iha parokia ne’e hein hela relijiozu/a sira nia presenza”. Iha “sambutan” Amu-Bispu agradese mos ba madre provinsial no konsellu ne’ebe ho laran-luak no lalais hatan ba ninia konvite. Liu husi vigariu parokial nian ‘sambutan’ nia agradese mos ba Irman sira nia prezensa ne’ebe sei sai tulun bo’ot ihaParokia ne’e liu-liu bele tulun sarani barak besik ba Maromak.
Ami agradese barak ba Orasaun no tulun hotu ne’ebe halo ba ami membru komunidade foun ne’e. Ami husu kontinua reza ba ami atu tebes sai bensaun ba ema hotu ne’ebe ami hasoru iha ami nia misaun iha rai doben Sumba ne’e.
Uma ne’e lori naran Irmán Angela Vallese, ne’ebé lidera primeira espedisaun misionária FMA iha tinan 141 liubá ba Amérika Latina. Atu ninia laran -manas misionária inspira komunidade foun ne’e.
