Husi Ir Albina FMA
Fatumaka – Bazeia ba tinan ida ne’e ne’ebé Kreda dedika nu’udar tinan familia nian no mós fulan ida ne’e nu’udar fulan Na’i-Feto nian, iha loron Domingu,18/05/2014 grupu Infánsia misionária Baucau, hamutuk nain 58, inan- aman ka reprezentante husi inan-aman na’in 13 no mós animadores na’in 8 no madre na’in 2 halo Peregrinasaun ba Santuáriu Maria Auxiliadora Fatumaka.
Iha peregrinasaun ida ne’e labarik sira hotu entuziasmu hodi partisipa maski udan tau maibe lahamate sira nia hakarak no sira nia domin no devosaun ba Na’i-Feto. Tuir dalan maski malirin no balun bokon maibe sira reza no kanta ho entuziasmu husi Baucau to’o Santuáriu Maria Auxiliadora Fatumaka.
Atividade ne’ebé ami hala’o mak Misa hamutuk iha Santuáriu, halo jogos no aprezenta atraksi ne’ebé labarik sira prepara, no reza tersu hamutuk iha Santuáriu Maria Auxiliadora.
Objetivu ba atividade ida ne’e atu sensibiliza Inan-Aman no labarik sira ba tinan familia nian ne’ebé Kreda dedika no mós haburas sira nia domin no devosaun ba Maria. Iha misa Pe. Adoy fó lia menon ba sarani sira katak labarik ki’ik oan sira ne’e bele sai ezemplu ba ita hotu. Sira la halo buat barak maibe ho sira nia prezensa, sira nia ksolok, sira nia hamnasa midar sira bele fó sasin ba Kristu, husu mós labarik sira atu ba oin nafatin iha sira nia atividade.
Iha avaliasaun ne’ebé ami halo hamutuk, reprezentante husi inan aman Sr. António sente kontente liu ho atividade ne’ebé ami hala’o no husu atu kontinua no aumenta tan atividade oi-oin atu envolve labarik sira, tanba sira fiar katak ho atividade sira ne’e bele tulun sira nia oan sira atu envolve-an iha Kreda nia misaun no halo sira sai labarik ne’ebé diak iha sosiedade. Reprezentante husi animador (Sabino) sente kontente no agradese tebes ba inan-aman nia kontribusaun no kolaborasaun ba atividade hotu ne’ebé ami halo durante ne’e no husu atu inan aman atu kontinua suporta oan sira nia atividade. Husi labarik sira, sira hotu sente kontente ho buat hotu ne’ebé ami hala’o.
Ho atividade ne’e halo labarik sira hotu kontente no entuziazmu atu ba oin ho sira nia komitmentu hodi sai LABARIK APOSTÓLU BA LABARIK no disponivel nafatin ba atividade Kreda nian.
