Dili – Molok atu selebra tinan 140 espedisaun Misionária FMA nian, ami nia komunidade S. João Bosco Balide hahú ho triduu loron dahuluk nian iha loron 11 Novembru 2017. Komunidade foti inisiativa ba reza orasaun hamutuk iha Farol Dili. Iha Tempu hanesan halo mós despedida ba Irma Albina do Carmo ne’ebé hetan obediénsia foun ba Misaun iha Cailaco.
Iha loron 14 Novembru 2017, Komunidade FMA Balide selebra Festa Espedisaun Misionária FMA ba dala 140 hamutuk ho Antiga/os , família no kolaboradór/a sira hotu. Iha loron ne’e mós organiza ‘certame’ ba hirak ne’ebe partisipa iha selebrasaun ne’e. Pergunta ba kadi-kakutak nian kona-ba Misionária FMA dahuluk sira nia moris no misaun ne’ebe sira hala’o durante sira nia moris nudar FMA to’o rohan. Partisipante sira ho entuziazmu aprende duni kona Misionária sira nia moris maski balun la’ós foin-sa’e maibé fuan manas atu hatene no koñese Irmã Misionária dahuluk sira nia moris.
Remata tiha ‘certame’ hahú kedas ho Eukaristia Santa ne’ebe Preside husi Pe. Inocencio Diamantino da Silva, Sdb. Iha omilia mensajem ne’ebe padre hato’o, katak Sarani hotu mak Misionáriu/a tanba ita hotu nia knaar mak haklaken Liafuan di’ak ba ema. Husi selebrasaun Espedisaun Misionária ne’e hafanu fila fali ita ida-idak nia entusiazmu atu sai misionária/u/a iha Família laran, eskola no mos fatin hirak ne’ebe ita bele hasoru malu. Irmã FMA nain 6 ne’e , ho aten brani husik sira nia rain ne’ebe sira hadomi, sira nia família no belun di’ak sira tanba de’it domin ba Kristu no Nia Liafuan sira. Atu dehan mós ho Irmán dahuluk sira nia sasin moris nian mak ohin loron ita mós bele hetan Misionária iha ita nia rain. Agradese wain ba Misionária dahuluk sira no mós Irman Misionária sira ne’ebé oras ne’e fó an atu serví Kristu iha fatin ne’ebé presiza Kristu nia naroman. Agradese mós ba Irmán Misionária sira ne’ebé serbisu iha rai doben Timor Leste, liu-liu husi ami nia Komunidade agradese ba Irmán Maria Letizia nia prezensa Misionária e’ebe ho fuan boot inan nian serví foin-sa’e kiak sira ho domin.
(Ines Bartolo Freitas)
