Venilale – Komunidade Edukativa Maria Mazzarello, halibur iha 18 Dezembru, depoizde matríkula ba estudante foun, atu rona tranzmisaun programa inspetoriál 2020 no halo programasaun komunidade nian. Molok programasaun ba 2020, iha fulan Novembru, sira halo ona avaliasaun hodi uza métodu SWOT analysis.
Iha enkontru ne’e, Ir Alma Castagna, Provinsiál FMA TIN, aprezenta uluk programasaun tinan 2020 nia objetivu no modalidade sira. Hanesan ita hotu hatene ona, objetivu jerál mak tuirmai ne’e: “Fiél ba karizma, ita asume estilu sinodál no hatán ba dezafiu ohin loron nian hodi serbisu hamutuk iha rede, kualifika ita-nia edukasaun no evanjelizasaun no kontinua akompaña foin-sa’e sira iha sira-nia krexmentu integrál”. Foin-sa’e sira-ne’e mak Na’i-Feto “entrega mai ita”, atu halo sira hetan “tua di’ak” ba sira-nia moris.
Hafoin, profesór/a no Irmán sira fahe ba grupu tolu atu haree oinsá halo programasaun inspetoriál realiza iha realidade lokál. Grupu ida-idak aprezenta atividade sira ne’ebé bele integra tuir modalidade ne’ebé trasa husi inspetoria, hahú husi semana orientasaun nian ba estudante foun sira, ba novena/tríduu Don Bosco nian, ho jornada espiritualidade kona-ba Reitór-Mos nia estréia; ba festa padroeira ETV Madre Mazzarello nian ho camping kona-ba “akompãmentu ba adolexente sira”, hala’o nu’udar “mesa redonda”. Nu’udar toman ida, ami sei aproveita mós tempu forte sira no festa gratidaun komunidade nian.
Komunidade edukativa hakarak atu hakbesik ba Antiga Aluna sira ne’ebé hela iha Venilale hodi halo vizita ba sira nia família. Sira-ne’e maski barak maibé bainhira ita selebra eskola nia tinan 25, iha Agostu 2019, sira la mai partisipa.
Ami sei kontinua mós dalan atu halo foin-sa’e sira protagonista liuhusi OREM no asosiasaun sira no mós kontinua akompaña sira liuhusi social media grupu “VOYCA”. Iha asosiasaun sira iha eskola, sei kontinua formasaun tuir “Christus Vivit” hodi foka aspetu afetividade mós.
Profesór sira husu atu hala’o formasaun kona-ba Sistema Preventivu no kona-ba metodolojia pedagójika.
Ita agradese Maromak ba tinan ida ne’ebé remata daudaun ona, no ita kontinua husu nia grasa ba tinan pastorál foun 2020.
(JG)
