Venilale – Ohin, loron kuarta ( 15/02/2017) Sr. Ilídio Ximenes da Costa, Secretário do Estado para a Política de Formação e Emprego” (SEPFOPE) hala’o nia vizita badak iha komunidade saleziana Venilale antes hatutan ninia viajen ba Munícipio Viqueque.
Objetivu husi vizita ne’e mak primeiru atu haree proposta ne’ebe padre no madre sira hatoo iha tinan kotuk ba SEPFOPE. Segundo objetivu mak atu haree besik liu realidade ne’ebe iha no mós ajuda sasán uituan ne’ebe SEPFOPE ihaba orfanatu S. Domingos Sávio, ba Escola Hotelaria e Turismo St. Maria Mazzarello no ba Escola Secundária S. João Bosco. Iha diskursu badak husi Sr. ILIDIO XIMENES nia agradese tebe- tebes ba komunidade saleziana liuliu ba orfán sira no estudante sira ne’ebe ho domin no ksolok simu nia ho nia equipa.
Nia mós hateten katak sasán sira ne’e la’ós de’it husi Governo maibé mós ajuda husi Nasaun Parseiru sira hanesan husi povo coreano Sul sira.
Iha vizita ne’e señor Secretário do Estado, Sr. Ilídio rasik entrega simbolikamente Ekipamentu sira no materiál sira ne’e ba komunidade tolu ne’e. Ajuda ba Orfanatu sira mak hanesan roupa hamutuk caixa 4, sapatu hamutuk caixa 3, pasta eskola nian hamutuk caixa 4, sasán escritorio (lapis, caderno etc..) hamutuk caixa 2, entrega ba madre Teresinha Belo FMA ne’ebe responsavel. Ajuda ba ETV mak mákina halo Juice 1, Cup seller 1, mákina kua kripik 1 no forno tunu paun ( oven ) 1. Sasán hirak ne’e entrega no simu husi diretora da Eskola Madre Fabiola Simoes FMA. Ajuda ba Escola Secundária S. João Bosco mak laptop 1; computer 1; no microscop 2. Padre Avelino Guterres SDB, nu’udar director mak simu.
Ilidio mós hateten nu’udar antigu alunu D. Bosco nian nia sei esforsu atu buka dalan hodi ajuda Don Bosco nia oan sira seluk maski uituan no ki’ik. Secretário Estado ne’e mós fó mensajen ba estudante sira hotu atu aproveita no aprende didi’ak iha oportunidade durante iha eskola. Nia husu atu alunu sai realista, hodi buka aprende serbisu atu nune’e bele manán osan, labele mehi de’it ba universidade. “Ema ohin loron la hateke ba diploma, ba ó-nia títulu, maibé ó-nia skills, ó-nia abilidade iha área ida-idak”. Antes remata ninia vizita ho ninia equipa bá haree rasik fatin prátika sira ne’ebé Escola Técnico-Vocacional Sta. Mazzarello iha.
Ikusliu, Diretor Escola Secundária Católica S. João Bosco, padre Avelino Guterres, hato’o agradese wain no kontente tebe-tebes ba vizita badak husi ekipa SEPFOPE.
(Maria Fatima Freitas)
