Fatumaka – “Associazione Di Maria Ausiliatrice” (ADMA) maski harii tinan barak ona iha rai Timor, husi Padre Alfonso Maria Nacher SDB nia tempu, maibé foin mak halo kongresu dahuluk ho Padre Pierluigi Cameroni SDB ninia vizita iha rai Timor.
Kongresu hala’o iha loron tolu nia laran hahú husi loron 1-3 Maiu 2015 iha Fatumaca, iha santuáriu Maria Auxiliadora ninia mahon. Partisipante sira hamutuk 126 husi sentru 33 ne’ebé eziste. Prezente mós padre Provinsiál, padre Virgilio do Carmo SDB, padre Manuel Ximenes SDB nu’udar delegadu nasionál (loron uluk la prezente tan nu’udar Pároku akompaña Bispu Diocese Baucau ne’ebé fo krisma sarani sira iha Baguia, nune’e nia to’o kalan) ho mós irman FMA nain 5 nu’udar animadora espirituál ba ADMA sira iha sira nia sentru sira (Fuiloro, Laga, Baucau, Dili no Kailako). Oradór ba kongresu ne’e mak Padre Pierluigi Cameroni SDB rasik, basá nia mak nu’udar delegadu Mundiál ADMA nian, aleinde postuladór kauza santu sira-nian husi Família Salesiana.
Tema ba kongresu mak “Hakle’an liután ADMA nia identidade”. Tema ne’ebé furak no ninia konteúdu sira mós kona kedas partisipante sira nia fuan laran, basá sira hotu fila nakonu ho laran manas no komprende liután sira nia identidade lolos nu’udar ADMA.
Iha loron rua nia laran (1-2 maio) Pe. Pierluigi aprezenta “Artigu tomak Regulamentu ADMA nian (artigu 18 ne’ebé fahe ba parte rua: Natureza no objetivu ADMA nian no Estrutura ADMA nian)”, iha ne’ebé nia para hodi fó komentáriu no esplika kona-ba artigu ida-idak, halo partisipante sira kompreende liután maski lian italianu la’ós nu’udar dezafiu ida tan iha durubasa hodi esplika klaru. La’ós rona deit maibé nia kria mós servisu grupu no ho ninia relatóriu.
Loron dahuluk, maski kongresu hahú tarde uituan tan kongresista sira sei simu Pe. Pierluigi (tuir Timor nia tradisaun ne’ebé dala barak sai naruk), maibé oráriu sira ne’ebé determina ona husi Pe. Pierluigi la kansela. Servisu sira ne’ebé intensu iha loron rua nia laran, maibé kongresista sira la sente kolen, basá hala’o ho estilu salezianu katak iha animasaun nia laran. Loron dahuluk taka ho Rozáriu hamutuk hodi halo prosisaun ba gruta Na’i Feto Lurdes nian.
Iha loron daruak mós hanesan Pe. Pierluigi kontinua ho Artigu sira regulamentu nian. Loron ne’e taka ho Adorasaun ba Santíssimo Sakramentu iha Santuáriu Maria Ausiliadora no mós konvíviu husi sentru sira ne’ebé prezente iha kongresu.
Iha loron datoluk, membru ADMA tomak husi fatin sira hotu hahú husi sentru Kailako (Maliana) to’o iha sentru Lospalos prezente hotu ho sira nia membru ka reprezentante. Iha loron ne’e, molok hahú selebrasaun Eukaristia Pe. Pierluigi aprezenta tema Don Bosco ho Maria Auxiliadora” iha ne’ebé nia aprezenta ba ADMA sira oinsá mak Don Bosco ninia relasaun ho Maria Ausiliadora. Nia esplika hodi foti epizódiu barak husi Don Bosco nia moris ne’ebé iha relasaun ho Maria Ausiliadora. Hahú husi mehi tinan sia to’o harii bazílika Maria Auxiliadora no to’o fila fali iha tempu harii Basílika Sacro Cuore iha Roma. Devosaun ba Maria, Don Bosco aprende husi ninia inan, mamá Margarida katak iha ninia família. Mamá Margarida, feto husi sidade ki’ik maibé boot no matenek iha sabedoria Maromak nian.
Loron ikus (3 Maiu) remata ho selebrasaun Eukaristia, iha ne’ebé, membru foun sira halo sira nia kompromisu no mós simu medalla ADMA nian. Tempu hanesan iha mós grupu husi Baucau ne’ebé halo mós tomada de posse ba estrutura foun. Hafoin fó dokumentu agregasaun ho ADMA primária iha Turim-Valdoco nian ba sentru 33 ne’ebé eziste husi Pe. Pierluigi SDB no mos lista ADMA Timor nian husi Prezidente ADMA Señora Fátima Belo no ikus liu rekordasaun Bisentenáriu DB hodi fó ilas Bazílika Maria Auxiliadora Turim ba Santuáriu Maria Auxilidora iha Fatumaka.
Kongresu ne’e, tulun tebes ha’u katak koñese no hadomi liután grupu ida ne’e, basá liu husi sira nia knaar ne’ebé hakerek iha sira nia regulamentu, sira mós haburas misaun edukativa salesiana iha sira nia moris no sira nu’udar grupu ida (leigos) husi Família Salesiana iha ne’ebé Don Bosco rasik mak harii entre grupu haat (SDB, ADMA, FMA no Cooperador Salesiano) liutiha fulan sanulu konsagrasaun Bazílika Maria Ausiliatrice Torino (9 Juñu 1868) katak 18 Abril 1869. DB hakarak atu ADMA sira hatene lolo liman hodi tulun ba familia sira, sosiedade no Kreda no mós ba sira ne’ebé presiza tulun. Nia (DB) hakarak atu ADMA hodi imita tuir Maria Auxiliadora, espíritu salesiano iha ambiente moris loron-loron nian hodi fahe ho nia (DB), ninia laran manas edukativa maski la’ós dedika tempu tomak iha misaun ba foin-sa’e sira. Dala barak ita haree no hanoin katak ADMA ne’e assosiasaun ida ne’ebé ba de’it ferik no katuas sira, maibé membru ADMA la’ós deit ferik no katuas sira, iha mós foin-sa’e sira hahú husi tinan 18. Ita reza atu sira ne’ebé hola parte ba grupu ida ne’e, bele realize buat ne’ebé Don Bosco hakarak husi sira.
Kongresu ne’e hetan partisipasaun mós reprezentante husi “Salesianos Cooperadores” no Antigos Alunos Salesianos.
(Ernestina de Jesus)
