Venilale – Atu selebra loron RAI nian ne’ebé monu iha 22 Abril 2018, ho TEMA : “Mudansa klimátika”, komunidade edukativa Santa Maria Mazzarello, iha loron 11 Abril 2018, konvida mós formande sira iha komunidade Maria Auxiliadora atu partisipa / tuir formasaun ne’ebé Ir Jacinta Gusmão hato’o hodi hafanun fali ida-idak nia neon no laran kona-ba Amu-Papa Francisco nia Ensíklika “LAUDATO SÍ: Kuidadu ho uma ne’ebé ita hotu nian. iha introdusaun Ir Jacinta hahú ho pergunta: “Saida mak ita sei halo atu tau matan ba uma komún? Ita nia uma mak MUNDU.
S. Francisco de Assis hanorin ita atu bolu natureza, rai, ai-funan, loron, fulan, até mate, nst nu’udar ita-nia parente, biin, maun, feton-naan, tanba it ahotu kriatura Maromak nian, nune’e mesak feton no naan. Nia sai nu’udar modelu, ida-ne’ebé iha preokupasaun ba natureza, luta ba Justisa ba kiak, iha kompromisu ba sosiedade no moris ho dame iha fuan laran nian. Ita agora hasoru eh moris hela krize ekolójika ho mudansa klimátika sira no krize umana eh antropolójika ne’ebé mai husi krize valór ka étika, kulturál.
Atu hasoru krize sira-ne’e mak Laudato si husu atu ita moris “konversaun ekolójika”. Dalan ne’e ita halo ona ho atividade hanesan kuda ai-hun, aprende resiklajen, limpeza. Komunidade edukativa Madre Mazzarello buka haburas atitude sira respeitu ba natureza, ne’ebé inklui ita ema sira no hodi halo mudansa ba estilu moris ruma hanesan atu la “uza no soe” no ba tinan ne’e fokus liu iha “redús lixu”.
Aleinde formasaun ne’e, atu selebra loron Rai nian sei halo mós:
- paseiu ida ba “Ponte Natureza” ho objetivu atu rekoñese natureza nu’udar kriatura ida hanesan ita, no prepara video clip tuir tema ne’ebé grupu asosiasaun hili (Ekosistema, Tansa’ Ponte Natureza?…);
- kompetisaun tuir klase ida-idak: resiklajen atu halo lixeiru botilla ka uza kaixa hodi fahe lixu tuir kategoria, inklui mós prémiu ba aula ne’ebé moos liu.
- kompetisaun kanta nian atu hatudu alunu/a sira nia talentu.
Sira sei halo “expo” no premiadu sira sei aprezenta sira-nia produsaun iha festa Eskola nian, festa Madre Mazzarello ne’ebé marka ba loron 5-6 Maiu nune’e mós Premiasuan sei fó sai iha festa Madre Mazzarello nian.
Aleinde aprezenta Laudato Si, sira mós haree video clip aprezenta husi Ir Yasintha Hoar kona-ba oinsá halo resiklajen atu bele hanoin ona saida mak sira bele halo no book sira-nia kriatividade.
(Yasintha Hoar Bria)
