Superiór Jerál Institutu Filhas de Maria Auxiliadora, Madre Chiara Cazzuola, bainhira hili títulu Sirkulár Nú. 1054, hetan inspirasaun hosi apelu ne’ebé dirije ba foin-sa’e sira hosi João Paulo II—”Keta ta’uk atu sai santu !”—iha ne’ebé nia “afirma fali nesesidade atu sai santu, maibé labele ta’uk, liuliu.”
Hafoin liutiha fulan ida kanonizasaun Santa Maria Troncatti nian, Madre Cazzuola fo hanoin hikas grasa ba «eventu úniku no esepsionál» ne’e nian no buat di’ak ne’ebé nia lori ba nivel pesoál no komunitáriu, ne’ebé reflete iha rezonánsa sira ne’ebé nia simu hosi parte oioin mundu nian.
Konxiente kona-ba intensidade momentu nian, nia subliña nesesidade atu “fila fali, ho fuan, ho hanoin no iha orasaun” ba saida maka kanonizasaun ida-ne’e husik hela ba ita ida-idak nu’udar Filhas Maria Auxiliadora: “Oinsá eventu ida-ne’e fó impaktu ba ita-nia moris? Saida maka husu ita atu muda? Tanba sá ita labele avansa hanesan buat ida la akontese?”
Iha fulan Novembru, «ne’ebé haroman ho selebrasaun Solenidade Santu hotu nian», nune’e haklean iha dimensaun santidade nian, hodi konsidera oinsá «tenke prezente iha ita-nia moris no iha espiritualidade saleziana».
Grasa Kanonizasaun nian
“Tanba sa maka Kreda kanoniza santu sira?” Ho pergunta ida-ne’e, Inan Maria lori ita atu komprende motivasaun sira iha hahalok ida nia kotuk ne’ebé Kreda hala’o, la’ós de’it atu hasa’e indivídu balun nia moris, maibé nu’udar bolun ida ba konversaun, ba autentisidade moris nian, atu hateke ba Lalehan:
“Santidade mak bolun ida ba Lalehan; ne’e realidade ida ne’ebé pertense ba Maromak, ne’ebé ko’alia mai ita kona-ba Nia, kona-ba milagre Ninia asaun salvasaun no transformadora nian. Mai ita hateke ba eventu ida-ne’e atu ita-nia fuan bele nakloke no ita-nia matan bele sai naroman atu lee moris loroloron nian, atu komprende saida maka ita hadomi no saida maka ita konsidera importante.”
Santa Maria Troncatti nia moris, hanesan Don Bosco no Madre Mazzarello nia moris, hanorin katak «santu sira la’ós sira ne’ebe haketak an husi komunidade, fó hanoin mai ita katak ita hotu simu bolun ba santidade», maski dala barak ita hanoin katak santidade mak objetivu ida ne’ebé labele atinje no tanba ne’e iha tendénsia atu «hamenus ita nia nivel fiar nian, domin nian, duké buka buat ruma ne’ebé halo ita sai ksolok no kontente iha tempu no eternidade.”
Enkuantu «santu sira-nia moris hanorin ita katak posibel atu moris ho abut metin iha prezente ho ninia kompleksidade, hodi hanoin nafatin konvite atu halo nabilan hanesan fitun sira iha mundu» (kf. Fil 2,15).
Madre fo hanoin hikas Art. 5 Konstituisaun Institutu nia, subliña katak, nu’udar Filhas de Maria Auxiliadora, ita simu bolun atu envolve foin-sa’e sira iha viajen ida-ne’e, «la’o hamutuk ho sira iha dalan santidade nian», nune’e mós orienta sira atu esperimenta enkontru transformadór ho Jezús Kristu, hodi hatudu ba sira ai-riin edifísiu edukativu salezianu nian: Eukaristia, Rekonsiliasaun no abertura ba prezensa Maria nian, nu’udar Mestra no guia (kf. art. 71).
Tentasaun ne’ebe foin-sa’e sira hasoru bele mos monu ba laiha laran metin ba an rasik, rezignasaun, no tristeza, misaun FMA nian mak presizamente «tulun foin-sa’e sira atu hamrik metin no sai feto no mane loos, nunka renunsia ho an rasik, hanesan feto ne’ebé haktuir iha Evanjellu wainhira Jezús fo isin diak ba nia, hodi restaura nia kapasidade atu haree ‘liu tan’, atu ‘hateke ba leten’”.
Santu sira ho Fuan Misionáriu
Segredu husi misionáriu sira-nia frutu apostólika, Madre Maria observa, la hetan barak liu iha sira-nia kapasidade no realizasaun sira, maibé iha sira-nia santidade, iha sai “mane no feto sira fiar nian, esperansa nian, domin boot nian, moris interiór ne’ebé forte, pertense totalmente ba Maromak no apaixonadu ba evanjelizasaun”, iha “dimensaun moris nian ne’ebé kle’an” sai testemunha ne’ebe nakonu ho dosilidade ba Maromak Nia hakarak no sira nia laran-luak ne’ebé laiha limite. Sira maka misionáriu duni tanba, uluknanai sira maka dixípulu sira.”
No, hanesan Ezortasaun Apostólika Evangelii Gaudium subliña, misionáriedade kontra distinge ho sarani ida-idak «to’o pontu ne’ebé sira hasoru ona Maromak nia domin iha Kristu Jezús; ita la dehan tan katak ita mak dixípulu no misionáriu, maibé katak ita sempre dixípulu misionáriu» (EG 120).
Ne’e konviksaun ida—no ksolok ida—ne’ebé akompaña selebrasaun sira foin lalais ne’e ba tinan 150 husi espansaun misionária dahuluk Salezianu Don Bosco nian, iha loron 8 no 9 fulan-novembru tinan 2025, iha Torino Valdocco, ho eventu loron rua ne’ebé organiza husi Animasaun Misionária Italiana (BeAMission) iha loron 11 fulan-novembru, iha Bazílika Maria Auxiliadora nian, ho aprezentasaun “krusífixu misionáriu” ba Filhas de Maria Auxiliadora na’in hitu husi espedisaun misionária FMA ba dala 148, Salezianu Don Bosco na’in 15 husi espedisaun misionária SDB ba dala 156, no na’in neen husi espedisaun anteriór nian, durante Selebrasaun Eukarístika ne’ebé prezide husi Reitór Mor. Don Fabio Attard, ho prezensa Madre Chiara Cazzuola.
Tuirmai, selebrasaun aniversáriu ba dala 150 kontinua iha Génova, ho peregrinasaun ida ba Portu Antigu, hodi hanoin hikas misionáriu salezianu na’in sanulu dahuluk ne’ebé sai. Husi fatin ne’ebá iha loron 11 fulan-novembru tinan 1875, no ho inaugurasaun Muzeu Espedisaun Misionária nian iha Institutu Salezianu iha Génova Sampierdarena.
Viajen Misionária ida ne’ebé kondivisa
Iha sentidu ida-ne’e, Madre Chiara enkoraja partisipasaun—nu’udar Komunidade Edukativa sira—iha inisiativa importante ida iha preparasaun ba aniversáriu ba dala 150 Espedisaun Misionária FMA Dahuluk nian, ne’ebé sei hala’o iha tinan 2027. Inisiativa ida-ne’e, ne’ebé Setór Misaun sira propoin iha kolaborasaun ho ekipa PEM (Projetu Espiritualidade Misionária) mak fatin peregrinasaun nian iha liña Amérika Súl iha ne’ebé misionáriu dahuluk sira to’o iha tinan 1877.
Hodi taka Sirkulár, Madre Chiara dala ida tan konvida ita “atu reza maka’as ba dame, liuliu iha novena iha preparasaun ba Solenidade Imakulada Konseisaun Maria nian”, ne’ebé iha tinan ida-ne’e “sei hetan inspirasaun husi Santa Maria Troncatti nia biografia, iha-ne’ebé mosu Maria nia prezensa no protesaun espesiál”.
Ikusmai, hamutuk ho Irmán sira Konsellu Jerál nian, nia dezeja ba “imi hotu, imi-nia família sira, komunidade edukadora sira, foin-sa’e sira, adolexente no labarik sira ne’ebé entrega ba imi, Natál santu dame no esperansa nian”.
No madre hato’o «hanoin espesiál, parabens no orasaun nian ba Reitór-Mor, Pe. Fabio Attard, ba maun alin Salezianu sira, no ba Família Saleziana tomak».
Ita reza, liuliu, ba komunidade edukadante sira ne’ebé moris iha situasaun funu nian, violénsia nian, persegisaun nian, no injustisa nian. Ita iha serteza katak tulun sarani sira nian tau matan ba sira ida-idak, no buat hotu ne’ebé sira terus maka folin-boot iha Maromak nia fuan.”
Fonte: Cgfmanet.org