Roma (Itália). Madre jerál, M. Yvonne Reungoat, hetan nomeasaun husi Amu-Papa Bento XVI atu partisipa nu’udar Ouvinte iha Sínodu estraordináriu Bispu sira-nian. Iha Surat vaticana, simu iha data 14 Setembru, Sekretáriu jerál Sínodu nian, Mons. Nikola Eterović, hatutan ba Santu Padre nia konvite liafuan sira-ne’e: «Ha’u hetan onra atu informa ita katak Santu Padre Bento XVI, hodi tuir buat ne’ebé indika iha artigu 7 §2 Ordo Synodi Episcoporum, nomeia ita nu’udar Ouvinte ba Asembleia jerál ordinária Sínodu Bispu sira-nian da-XIII ne’ebé, ho tema “Evanjelizasaun Foun ba fiar sarani nia transzmisaun”, sei hala’o iha Vaticano, husi loron 7 to’o 28 Outubru 2012. Iha okaziaun ida-ne’e ha’u aprezenta ha’u-nia felisitasaun ba konfiansa ne’ebé Santu Padre hatudu ba ita hodi konvida ita atu serví Kreda universál ».
Iha surat hanesan, Arsebispu esplika katak Sínodu prevé prezensa númeru ema sira-nian ho kompeténsia partikulár ne’ebé iha relasaun ho tema sinodál dezigna nu’udar Ouvinte (amlulik sira, relijiozu no relijioza sira, leigu no leiga sira). No espesifika: «Prezensa ativa Ouvinte sira-nia relasiona ho sira-nia vokasaun ba fiar, nu’udar membru komunidade ekleziál no funsaun ne’ebé sira dezenvolve iha Kreda nia misaun. Nune’e, hodi hatán ho laran-luak no ho entuziazmu ba Santu Padre nia apelu, ida-idak hala’o paél ímpar durante eventu ida ne’ebé selebra natureza loos Kreda nian».
Ita haksolok boot ho La Madre ba nomeasaun ida-ne’e: FMA ida-idak bele sente hola-parte liután iha Kreda nia vida iha momentu ida importante no delikadu hanesan ne’e iha ninia istória. FMA no komunidade edukativa ida-idak nia prezensa liuhusi orasaun, liuhusi sintonia no kariñu sei akompaña La Madre, loron ba loron, iha ninia servisu kamurak ida-ne’e ba Kreda.
