Venilale – 18 Setembru, Parokianu Sagrado Coração de Jesus Venilale no família ho ksolok boot hamutuk ho Pe. António – Tukai, hasa’e misa agradesimentu ba Aman Maromak ba grasa vokasaun saserdotal ne’ebé Pe. António halo iha loron 14 Agostu liu ba hamutuk ho Pe. Celestino Costa, SDB no Pe. Victor Cunha SDB.
Selebrasaun misa agradesimentu ne’e realiza iha Parokia ho konselebrante husi Bibi Atan Dioseze Baucau, Don Basilio do Nascimento Martins no Amululik na’in 22. Iha homilia, Pe. Avelino Guterres SDB fó lia-menon ba Padre António- Tukai no Pe.Victor katak tan domin Maromak bolu imi atu serbi Igeja ba Maromak nia povu. Maromak entrega ninia povu mai ita atu taumatan ba sira, atu hadomi sira no liu husi Maromak nia grasa hasa’e sakrifisiu atu perdua povu ida ne’e nia sala. Liu husi imi-nia liman ne’ebé hasantu ona no liuhosi sakramentu sira ne’ebé sei hasa’e atu povu ida ne’e moris nafatin iha Maromak nia grasa no hetan moris rohan laek. Simu sakramentu ordenasaun katak ita iha responsabilidade boot ba ema-nia klamar no ba ema-nia moris rohan la’ek. Ho sakramentu ida ne’e husu imi atu mehi deit ba ema-nia klamar no salvasau hanesan Don Bosco hakarak “ Damihi Animas Coetera Tole”. Hahu reza misa katak hahu terus, maibé keta tauk no hakfodak tan Mestre ne’ebé mate iha kruz mós simu terus hanesan ne’e. Sakramentu ida ne’e husu ita atu hatudu Fidelidade ba Nia to’o rohan. Hafoin amu Avelino husu mós ba sarani atu reza nafatin ba Na’ilulik sira”
Hafoin Padre António iha ninia liafuan agradesimentu hateten “ho fuan nakonu ho ksolok tan grasa vokasaun Saserdotál ne’ebé Maromak haraik mai ha’u iha loron ordenasaun nian. Ha’u ata sai Na’ilulik la’ós tanba ha’u diak liu, santu liu no matenek liu maibé tanba Maromak nia grasa. Ha’u hili lema “ La’ós Ó mak fihir Ha’u maibé Ha’u mak fihir ó” tan iha ha’u-nia jornada vokasaun nian dehan mai ha’u katak Maromak fihir duni ida entre na’in rua ne’ebé haruka ulul ba Aspirantadu Beatu Filipe Rinaldi. Hafoin la’ós ó mak fihir Haú maibé Ha’u mak fihir ó, tan bainhira testing ami barak, maibé Maromak hili oitoan no ha’u tama oitoan ninian. Na’ilulik la’ós previleiju ida ka profisaun ida maibé vokasaun no grasa ida ne’ebé Maromak haraik mai ha’u atu fahe Maromak nia domin no serbi nia povu ne’ebé Nia haruka ha’u ba”.
Tuir mai, Amu Bispu Don Basilio mós fó hanoin ba ema hotu ne’ebé prezente iha Eukaristia ne’e katak, laiha Saserdote laiha Eukarista, laiha Eukaristia laiha Saserdote tan ne’e, maske Amululik sira ne’e ema maksalak no la folin tuir ema nian haree maibé ida ne’ebé bele selebra Eukaristia iha Altar mak sira ne’ebé Maromak hili ba vokasaun Saserdotal.
Hafoain seremonia konfraternizasaun no divertimentu, kontinua iha koléjiu Madre Mazzarello Venilale liu hosi knananuk, dansa no tebe-dai.
