Dili – Ohin, loron 5 Agostu 2016, loron ksolok boot ba “Instituto Filhas de Maria Auxiliadora” tanba iha loron aniversáriu Institutu nian ba dala 144, Irmán foun na’in haat halo sira-nia profisaun dahuluk iha Institutu: Ir Olfiana Ina Ki, Ir Josefa Ricarda Sousa, Ir Maria Sarmento Guterres no Ir Libania Pereira Moniz, hodi dehan “sim” ba Maromak.
Selebrasaun ba primeira profisaun ne’e hahú ho misa solene ne’ebé prezide husi Padre Provinsiál Salesiano, Pe. Apolinário Neto, SDB hamutuk ho padre konselebrante sira na’in lima (5).
Iha omilia padre Apolinário foti fali fraze Irmán foun sira hili ba sira nia motto: “Na’i mak bolu, Na’i mak hili” hodi esplika fali liafuan vokasaun hahú husi família, husi família mak oan sira deskobre Maromak no hadomi Maromak ulukna’in iha família laran, hafoin mak sai ba liur, nune’e família nia papél importante liu ba oan sira nia kreximentu fiar nian.
Sira nia “sim” ba dala uluk ida ne’e lori tempu naruk hodi deskobre Jezús ne’ebé bolu sira husi sira nia etapa moris nian, hahú ho sira nia esperiénsia iha etapa formasaun nian to’o lori tempu barak to’o sira deskobre no fó resposta ho fiar katak “Na’i mak hili sira ida-idak”, to’o ikus 
sira deside hakarak hela ho Jezús no Irmán maluk sira iha komunidade ida nia laran: ne’e mak sasin moris nian.
Padre salienta liután katak mundu ohin loron iha dezafiu oioin maibé Irmán na’in haat ne’e brani foti desizaun atu moris tuir Kristu ne’ebé sira hili nu’udar ida ne’ebé bolu sira: “Husik Jezús de’it mak sai sentru ba imi-nia moris tanba Kristu mak ita nia Salvasaun loos”.
Sira nia empeñu mak: tanba Na’i mak bolu no hili, nune’e sira ida-idak buka hakaas an atu sai fiél ba Na’i iha moris loroloron hodi tau laran-metin de’it iha Nia.
(Ines Freitas Bartolo)
