Dili – Depois de ferias ba Festa boot; Natal no Tinan Foun nian, EBC Maria Auxiliadora hahu kedas ho Orientasaun ba alunos-alunas foun 7º ano nian durante loron tolu nia laran, hahu husi loron 6 Janeiro, to’o ohin 8 de Janeiro 2020, ho total alunos hamutuk 114 husi; Mane nain = 60 no Feto nain = 54.
“Orientasaun mak ato ka maneira ida atu orienta, fó koñesimentu, instrusaun no regra ba alunos foun sira atu bele hatene no tama didiak iha Sistema Escola Maria Auxiliadora nian (Sistema Salesiana), wainhira prosesu aprendijazem nian komesa. Nune’e bele forma ema sai sidadaun ne’ebé honestu no sarani ne’ebé diak, nudar Dom Bosco hakarak. Sarani ne’ebé diak hatene hala’o nia dever ho didiak katak; ba misa, reza, komporta diak, hala’o knar no haksolok nafatin, hanesan Saun Domingos Savio; hala’o buat hotu ho ksolok no la bele halo sala, ‘Diak liu Mate duke halo sala’.” Ne’e mak lia fuan badak Bemvindos nian husi Me. Sebastiana Costa, nudar Madre Diretora Komunidade Eusesbia Palomino nian ba alunos foun sira.
Atividade hotu loron dahuluk nian anima husi: Madre Diretora Escola, Me. Suzana Alves dos Santos, Professor Geraldo da Silva nudar Coordenador ba 3º ciclo nian, hamutuk ho equipe organizadores husi alunos 8º ano sira, ne’ebé orienta alunos foun sira ba grupo tuir koris, no kontinua ho animasaun no konhese malu nian. Hafoin apresenta mos programasaun no regulamento sira escola nian husi Prof. Geraldo. Atividade hahu husi oras tuku 7h45-12h15
Loron daruak: Loron ne’e alunos sira mai ho faru kor oin-oin no atividade sira realiza tuir kores grupo nian. Ba sesaun dahuluk, hato’o husi Me. Sebastiana Costa kona ba “Oinsa Hari Paz no Dame”. Ho aktividades oin-oin ne’ebé kreativo hodi invoka alunos sira nia partisipasaun aktivu no tulun sira atu hatene kuda fini dame no paz iha ida-idak nia fuan, famiília no sosiedade. Ikus taka ho aktividade serbisu grupo no apresentasaun kona ba oinsa hari paz.
Ba sesaun daruak, hato’o husi Me. Ligia Sarmento, fma, koalia kona ba “Higiene pessoal no ambiente”. Iha Irmã nia apresentasaun husu atu ema ida-idak nia haka’as-an maksimu ho meius oin-oin atu bele tau matan no protege ba nia saúde atu bele sai diak. Ninia objetivo mak atu ita ema bele hetan saúde diak no mos nafatin. Nune’e mos ba Meiu Ambiente atu saudavel presiza hamos no trata diak ita nia ambiente aredores sira.
Loron Ikus Orientasaun nian; Loron Technology digital no loron talent show nian.
Tecnologia Digital hanesan meius ida ne’ebé mundo oferese ba ema nia nesecidades ne’ebé iha mos nia vantagem no desvantagens.
Nia vantagem sira mak iha area oin-oin hanesan iha aprendizajem nian: fasilita materia sira ba estuda no peskija nian. Area informasaun ka komunikasaun nian fasilita komunikasaun lalais no hetan mos informasaun
Tecnologia nia desvantagem: lakon tempo barak ba jogos sira no hamenus relasaun entre ita. Nune’e Afonso husu ba alunos sira atu hatene utiliza digital ho matenek no kreativo.
Depois de rekreiu grupo ida-idak apresenta sira nia talentos liu husi dansa, canta no poesia ne’ebé anima tebes aktividade iha loron ikus nian. Ikus liu atu halo amizade sai metin liu tan entre sira, ami halo merenda komfraternidade ne’ebé riku los ho aihan oin-oin nebe sira rasik prepara husi uma.
(Zélia Matos Lemos)
