Cailaco – Domingos Sávio hetan santidade nia abut husi esperiénsia moris loron-loron nian. Nia la halo buat ne’ebé extra ordináriu maibé nia halo nia atividades loron-loron nian ho ksolok no domin. Knar loron-loron nian nia halo ho fuan no laran tomak no ida ne’e mak sai extra ordináriu iha Maromak nia matan.
Modelu santidade Domingos Sávio nian sei relevante nafatin too ohin loron, hodi dada atensaun foinsa’e no labarik sira atu fo importánsia ba knar loron-loron nian hodi halao ho domin no responsabilidade.
Iha selebrasaun festa Domingos Sávio nian, pre-escolar ne’ebé hamahan –an ho protesaun Domingos sávio nian, iha biban atu selebra hamutuk ho familia sira. maske adianta ba dia 7, maibé hetan partisipasaun husi Komunidade edukativa no familia labarik sira nian. Selebrasaun hahu ho misa hafoin kontinua ho konviviu no merenda hamutuk.
Iha omilia Amu Norberto hateten katak Domingos Sávio nia santidade posivel tan hetan akompañamentu husi Don-Bosco. Los duni edukasaun ne’ebé D.Bosco oferese fasilita Domingos Sávio nia dezeju santidade nian. Nia hatutan katak eskola ne’e fihir Domingos sávio nu’udar protetor atu husi lalehan hamatan nafatin ba labarik ida-ida, atu sai fini diak ida iha futuru.
Iha festa domingos Savio nia ami selebra mos labarik sira ne’ebé halo tinan iha fulan Janeiro too Maio inklui mos Me. Gigi no profesora sira.
Buat hotu lao diak tan hetan kolaborasaun makas husi familia sira. Ita hein katak familia sira kontinua sai sensivel ba oan sira nia edukasaun espiritualmente no intelektuál.
(Albina do Carmo)
