Loron Espiritualidade Família Saleziana edisaun da- 40 ne’ebé hala’o husi 13 to’o 16 Janeiru 2022, hanesan baibain nia tema mak Reitór-Mor nia Estréia: “Halo buat hotu tan domin, la iha buat ida hodi kbiit”.
Loron Espiritualidade Família Saleziana nia finalidade mak hamoris Espiritualidade Saleziana iha ninia dimensaun fundamentál sira, ne’ebé Reitór-Mor nia Estréia sujere, iha komuñaun ho grupu 32 Família Saleziana nian.
Hanesan akontese iha tinan 2021, nia modalidade mak “prezensiál” no “dijitál”, no ema rihun ba rihun pertense ba grupu sira ai-hun boot ne’ebé Don Bosco kuda hahú ho espiritualidade S. Francisco de Sales nian, bele tuir programa ne’ebé nakonu ho eventu, okaziaun reflesaun no aprofundimentu nian, momentu komuñaun, partilla no espiritualidade nian, ne’ebé hariku tebes.
Iha rejiaun ida-idak sei halibur iha prezensa no iha mós momentu online.
Ba eventu mundiál sira iha live streaming pájina facebook no Youtube ANS nian ho tradusaun ba lian oioin inklui lia-tetun.
Kinta 13 hahú ho sesaun abertura nian ho aprezentasaun Programa husi Pe. Joan Lluís Playà, Delegadu Sentrál Reitór-Mor nian ba Família Saleziana, konkluzaun tinan Don Paolo Albera nian, Don Bosco nia Susesór, no aprezentasaun Estréia husi Reitór-Mor Pe. Ángel Fernández Artime.
Sesta 14 loron-tutun atividade nian iha “mesa redonda” kona-ba espiritualidade S. Francisco de Sales nian husi espesialista na’in tolu: SDB na’in tolu (Pe. Michele Molinar, Pe. Eunan McDonnell no Pe. Giuseppe Roggia), jornalista ida, Vania de Luca,no Irmán Maria Grazia Franceschini, husi Orden Vizitasaun Santa Maria, ne’ebé S. Francisco de Sales harii, ko’alia kona-ba tema sira hanesan: espiritualidade saleziana, afinidade espirituál entre S. Francisco de Sales no Don Bosco, “grasa unidade nian” iha éstaze moris no asaun, vida relijioza tuir santu bispu ne’e, no atualidade espiritualidade S. Francisco de Sales ba leigu/a sira nu’udar dalan santidade nian ne’ebé ema hotu bele asesu.
Loron ne’e sei kompleta ho intervensaun husi Pe. Pierluigi Cameroni, Postuladór Jerál Kauza Santu sira-nian ba FS, kona-ba santidade saleziana.
Sábadu 15 siiha tranzmisaun no partilla kona-ba serbisu iha grupu sira ne’ebé hala’o iha nivel rejionál, no aprezenta esperiénsia signifikativa sira espiritualidade saleziana iha asaun, foin-sa’e ida no leiga ida. Ba partisipante prezensiál iha Valdoccoiha mós inaugurasaun Mostra ba Tinan 400 S. Francisco de Sales nia mate , iha ‘Museu Casa Dom Bosco’, Torino-Valdocco.
Ikusnian, iha domingu, 16, iha konselebrasaun Eukarístika iha Bazílka Maria Auxiliadora Torino nian, ne’ebé Reitór-Mor mak prezide; no Enserramentu Loron Espiritualidade Família Saleziana 2022.
Tinan ne’e, Pe. Alejandro Guevara, Assistente Espirituál Mundiál Assosisaun Maria Auxiliadora (ADMA) nian mak koordena – ne’ebé ba tinan 2022 nu’udar edisaun da-40: Loron Espiritualidade sira-ne’e mak insiativa furak hahú durante Reitoria Pe. Egidio Viganò nian, hanesan Pe. Playà komenta.
(fonte ANS)
