Dili, 25. 06. 2022. Irmán sira no Novicia sira ba halo Promosaun Vokasional iha Escola Secundário Geral 10 de Desembro Dili. Loron Sábado mak eskola refere halao sira nia atividade Extra-kurikuler nune’e Irmán sira ba iha ne’eba hodi halao sira nia atividade. Promosaun Vokasional ne’e hahu ho Kampu-Mazzarello, atu halo Joven sira ne’e hatene ituan kona ba Madre Mazzarello nia moris no misaun hafoin aprezenta mos misaun ne’ebé FMA halao to’o ohin loron no iha Timor. Iha estudante besik 80 husi klase 12 mak partesipa ho sira niahakarak rasik, tamba barak mak tuir atividade desporto nian. Maski sira ladun barak maibe Irmán no Novicia sira sente haksolok tebes atu hakbesik, koalia no halibur sira atu fahe informasaun kona ba Filhas de Maria Auxiliadora. Irmán no Novicia sira nia espresaun kona ba Eskola ne’eba mak: “Ami agradese tebes ba Maromak, agradese ba Maria Auxiliadora, Dom Bosco no Madre Mazzarello tamba ohin ami bele ba iha fatin ne’ebé ami hein kleur los atu ba. Eskola Secundário Geral 10 de Desembro Dili. Ami rona kona ba Eskola 10 Desembro mak Eskola ne’ebé iha konflito no estudante sira nakar maibe wainhira ami ba hasoru tiha sira, koalia ho sira no liu-liu fahe ba sira kona ba Madre Mazzarello, hare katak sira hatene rona, disiplina, partesipa ho ksolok iha animasaun sira no fo atensaun maximo ba ami nia aprezentasaun. Espreriensia ne’e halo ami sente haksolok tebes tamba ami bele sai no ba to’o iha joven sira ne’e nia le’et hodi hato’o buat ruma ba sira ne’e. Ami hare katak sira barak liu mak mai husi foho atu buka matenek iha sidade, sira presiza ema ruma fo motivasaun ba sira, hatudu dalan ba sira no suporta sira ho moral no espiritual. Ami promete ba sira ami nia orasaun no ami husu ba nain hira ne’ebé le’e dadaun hela notisia ne’e atu reza mos ba joven sira ne’e atu sai sarani diak no sidadaun onestu. Sira mos mak futuru Kreda no Nasaun nian”.
Ami agradese wain ba Diretor da Escola no Professores sira ne’ebé fo ona fatin no tempo mai ami halao ami nia atividade sira. Molok fila ami hasoru Adjunto Eskola nian hodi agradese diretamente ba nia, nia dehan: “ Ami agradese tebes ba Madre sira nia prezensa iha Eskola ne’e, ne’ebé bele fahe ona inforamasaun diak barak ba estudante sira. Ami hein atu Madre sira mai tan fali iha tempo sira tuir mai, tamba estudante sira ne’e presiza tebes liafuan diak sira atu tulun sira iha futuru. Obrigada barak ba prezensa”. Ida ne’e nu’udar oportunidade furak no esperansa ida mai ami atu halo planu diak liu tan ho atividade sira atu bele ba hasoru sira ho animadu liu tan.
(Noémia de Deus, FMA)
