Venilale – Loron Batizmu Na’i nian sai oportunidade atu hafoun fali kompromisu Batizmu nian hodi moris nu’udar ema responsavel no ho konxiénsia, mistériu ita-nia filiasaun divina. Batizmu mak odamatan atu tama iha moris komuñaun nian ho Maromak no iha ninia Kreda, nune’e mós iha Kristu nia mistériu paskál. Ho Kristu ita mate ba salan no moris hikas ba moris foun, ita sai kriatura foun, hodi simu limarohan moris rohan-laek no bolun ba santidade.
Iha Domingu Batizmu Na’i nian, Komunidade FMA Madre Mazzarello ho foin-sa’e sira koléjiu nian hakarak konnfesa fiar ho an tomak ho konviksaun foun, ho konfiansa no esperansa no halo nabilan ba beibeik, ksolok no entuziazmu foun mai husi enkontru ho Kristu. Nune’e mak iha tempu orasaun Vésperas nian, ami hakat fali ba fonte batizmál, repete fali ami-nia promesa “hakribi Diabu no nia babeur sira” no haklaken ami-nia “fiar iha Maromak Santíssima Trindade”. Ami mós repete jestu sira ne’ebé sei ki’ik inan-aman no padriñu sira mak halo.
Ohin, hodi halo hamutuk ida-ne’e fó hanoin fali katak ita “labele sai santu mesa-mesak no Maromak la salva ita mesa-mesak: «ema la hetan salvasaun mesa-mesak, nu’udar ema ida ne’ebé ketak husi sira seluk» (GE, 6). Nune’e empeñu atu tau matan ba malu, sai edukadora santa atu tulun joven sai santa/u.
Ho Batizmu aleinde simu filiasaun divina, ita mós simu múnus tolu nu’udar ema ho raan liurai, múnus amlulik nian no knaar profeta nian, ne’e katak ita sai ema santu/a.
Amu-Papa Francisco fó hanoin mai ita katak, Maromak “hakarak katak ita hotu sai santu no la hakmatek an ho moris ne’ebé baibain no laran-morna” (GE 1), nune’e mós Reitór-Mor nia estréia 2019 nalian Amu-Papa no Don Bosco rasik nia hakaran katak ita-nia moris nia objetivu mak santidade. Batizmu mak odamatan atu tama iha moris santidade “hanesan ita-nia Aman iha Lalehan santu”. Atu ho renovasaun Batizmu nian ita iha kbiit liután atu moris tempu baibain ita-nia “sequela Christi”.
(JG)
