Baucau – ADMA Timor Leste halo sira nia retiru kuarezma nian a nivel nasional iha Baucau atu halo preparasaun ba festa paskua. Iha momentu nebe hanesan ADMA husi kada paroquia ka kada komunidade aprezenta mos sira nia programa nebe durante nee halo no planu nebe sira sei realiza iha tinan 2022. Delegado no animador local nebe durante loron rua akompanha partisipante sira mak: SDB nain tolu no FMA nain lima.
Enkontru nee realiza iha loron rua nia laran. Iha dia 11 de marco, ADMA sira halibur hamutuk iha Baucau, hafoin hahu kedas ho aktividade spiritual hanesan: reza rozario husi sira nia hela fatin ba Katedral, Via Sacra hamutuk ho sarani sira husi Paroquia Baucau nian, halo novena ba S. Jose no ikus taka ho Misa abertura ba enkontru ADMA nian.
Iha loron 12 marco, depois de liafuan makloke husi Presidente ADMA Nasional Sra. Maria de Fatima, aktividade hotu konsentra iha refleksaun nebe fo husi orador nain rua. Pe. Andre Belo SDB konvida partisipante sira hotu atu reflekte kona ba importancia Eukaristia no Familia, iha nebe Eukaristia sai nudar hahan espiritual nebe hamoris no haburas familia nee rasik. Hafoin iha refleksaun daruak nian Me. Cecilia del Mondo FMA aprezenta kona ba mensajem Amu Papa Francisco nian iha tempo Kuarezma 2022 nebe dehan LA BELE KOLE ATU HALO DIAK. Iha refleksaun nee, orador konvida ADMA sira atu la bele kole halo diak iha sira nia misaun no apostuladu.
Depois de palestra nee, sei fo mos biban atu bele halo “husu no hatan”. Ikus ba retiru kuarezmal nian mak taka ho Misa enceramentu no han hamutuk. Espera katak ho retiru hamutuk nee bele tulun membro ADMA Timor Leste hotu atu bele hatan ba Amu Papa nia konvite kona ba sinodalidade, katak dalan sinodalidade mak dalan Maromak nian.
(Pe. Isaías Bonifácio,SDB)
