Dili – Família Saleziana, zona Dili nian, ne’ebé kompostu husi SDB, FMA, Salesianos Cooperadores, ADMA, Antigos Alunos, VDB, ohin 23-Fevereiru-2019, hala’o retiru misionáriu dahuluk iha Komunidade Post Novisiado SDB Comoro Dili, hahu tuku 8.30 no remata 2.30 otl. Atividade ida ne’e hala’o atu hatan ba Reitor-Mor nia hakarak ne’ebé atu promove “ Formasaun konjunta” entre grupu sira Família Saleziana nian. Objetivu ida husi atividade ne’e mak grupu Família Saleziana sira sei hetan proveitu boot ba sira ida-idak nia formasaun Kristán- Saleziana- misionária. Retiru ida ne’e antisipa festa S.Callisto Caravario no S. Luigi Versiglia. Aprezentador ba reflesaun mak Padre Manuel Fraile,SDB ho frater sira.
Uluknanai hato’o kona ba Santo Nain rua nia biografia, hafoin reflesaun ruma kona ba Callisto Caravario nia surat/karta ne’ebé hakerek ba nia mamá, karta ne’ebé klean liu, haktuir buat furak oioin kona ba misaun iha Timor no Cina. Buat ne’ebé importante liu mak nia husu nafatin orasaun ba nia mamá atu akompaña nia iha rai misaun. 
Karta balun ne’ebé nia hakerek ba nia mama wainhira nia hala’o misaun iha rai Timor : “Ha’u hadomi liu povu Timor, iha ne’e maioria Katolika, maibé tanba obedese ba superior sira ha’u tenke fila fali ba hala’o misaun iha Cina, atu bele simu ordenasaun, ha’u agradese ba mama no família ne’ebé oferese hau ho laran luak ba Maromak ba misaun Don Bosco nian, Don Bosco dehan família ida ne’ebé mak iha oan sai nailulik sira sei hetan bensan too jerasaun dahaat, tan ne’e mamá sei haksolok, oinsá mamá nia Callisto sai nailulik, ha’u la husu ona buat ida família, ha’u husu deit mak orasaun”.
Iha reflesaun kona ba sira nia laran manas misionáriu ida ne’ebe fo duni motivasaun ba ami ne’ebé tuir retiru, hodi konvida ami atu haklean espiritualidade Saleziana atu bele moris ho ksolok ami nai vokasaun saleziana no ida idak nia vokasaun iha Kreda tan husi batizmu ita hotu sai misionária. Martir sira nia domin ba misaun mak sai modelu ba membru Família Saleziana hotu, tenke sente an nu’udar evanjelizadora, proklamasaun Evanjellu liu husi ita nia estilu moris nian, atu ita bele ba hasoru Kristu nia interese, ita tenke sente fuan monu ba Kristu atu bele lori Kristu ba ema seluk liu husi ita nia knaar loron-loron nian. Ida ne’e husu ba ita membru Família Saleziana tenke sai sasin kredivel: Misionáriu ida ne’ebé korajozu no entuziasmu hodi supera dezafiu no difikuldade sira ne’ebé impede ita atu promove atitude missionaria nian, atu bele lori Kristu ba foin-sa’e sira, hodi akompaña foinsa’e iha dalan fiar nian no husik sira sente sentidu moris nian. Ohin loron iha Timor presiza evanjelizasaun daruak (Re-evanjelizasaun), presiza hala’o pastorál ho mentalidade ida ne’ebé lori Jezús ba ema seluk katak brani ko’alia kona ba Jezús. Hanesan Reitór-Mor nia apelu ne’ebe enkoraja ita “ KETA TAUK ATU SAI MISIONÁRIA”.
(Maria Sarmento Guterres)
