Dili – Durante loron 2, husi 24-25 Juñu, ami juniores hala’o enkontru hamutuk ho Ir Alma Castagna, provinsiál FMA TIN, ho tema “Akompañamentu ne’ebé bazeia ba Don Bosco no Madre Mazzarello nia esperiénsia”. Husi Don Bosco nia esperiénsia, iha adultu nain 4 ne’ebé akompaña no tulun nia iha ninia kreximentu umanu no espirituál atu deskobre Maromak nia hakarak no halo nia aprende husi esperiénsia ne’e atu sai amululik ne’ebé guia foin-sa’e sira; no Madre Mazzarello ninia akompañamentu ba Irmán barak husi ninia sasin moris nian maske ninia esperiénsia ladún naruk.
Objetivu husi enkontru ne’e mak atu halo ami aprende oinsa atu sai akompañadora ida ne’ebé matan moris atu tulun labarik ka foin-sa’e ida bele deskobre dalan ne’ebé nia buka no tulun ema atu komprende saida mak Maromak hakarak.
Iha loron dahuluk ba enkontru ne’e, ami hahú ho orasaun abertura ne’ebé foti husi São Paulo nia surat ba Timoteo (1Tim. 4,12-16) no kontinua kedas ho drama badak ne’ebé komunidade ida-idak prepara tuir sira nia kriatividade, bazeia ba materiál ne’ebé Ir Alma Castagna husu atu juniores ida-idak lee, estuda no reflete, kona ba atitude no verbu komún entre Don Bosco no Madre Mazzarello sira nia akompañamentu.
Iha tuku 06.30 lorokraik reza tersu no vésperas hamutuk hodi reflete kona ba hahalok Maromak nian ne’ebé akompaña povu Israel.
Iha loron tuir mai, ami hahú enkontru ho orasaun São João Paulo II nia orasaun kona ba akompañamentu no Ir Alma Castagna aprezenta tópiku kona ba pontu importante sira atu moris nu’udar akompañadór/ora Salesiana ne’ebé Padre Salesiano ida estuda kona ba Don Bosco nia akompañamentu; pontu sira ne’e mak hanesan: enkontru, rona, fiar/konfiansa, hatudu laran-sadia.
Hafoin Ir Alma hatudu filmajen badak kona ba attitude hirak ne’e, no husu ami atu hare fila fali ba nia esperiénsia loron-loron nian hodi fahe ba grupu 4 no sharing. Hotu tiha ba aprezenta iha Assembleia no Ir Alma halo rezumu no ami taka ami nia enkontru no orasaun.
Obrigada barak!
Juniores Inspetoria TIN
