Venilale – Ohin, 06/05/2017 iha Venilale selebra festa S.Domingos Savio nu´udar mahein ba labarik oan – kiak sira iha Orfanatu no tempu hanesan sai mahein mós ba inan sira ne´ebé atu tur ahi. Ninia santidade mak Sasukat a´as amizade ho Jesus no sasukat a´as amizade ho ema seluk. Horseik loro-kraik labarik sira (120), hamutuk ho Mana Sira (Voluntaria, Pre-Aspirante no Aspirante) hato´o sira nia omenajen ba Domingos Savio.
Sira haktuir fali Don Bosco nia liafuan ne´ebé dehan:
Atu sai santa; ha´u tenki haksolok nafatin, halo didi´ak ha´u nia kna´ar, sai Jezús nia belun no keta haluha halimar no tulun ha´u nia maluk sira. Hotu tiha sira nia aprezentasaun sira rasik promete hakarak atu moris hanesan Domingos Savio. Mai ita reza ba sira atu liafuan sira ne´e sai realidade.
Nu´udar Komunidade ami mós agradese ba família boot FMA, SDB Estudantes ETV, Seminaristas no sarani sira. Basá hamutuk ho sira selebra festa ne´e iha Parókia Venilale, ne´ebé prezide husi Pe. Abrão Pinto SDB. Iha omilia Padre dehan: “buat ne´ebé Domingos Savio aprende husi DB; santidade konsiste iha ksolok. Ema ne´ebé haksolok, hakmatek katak ema ne´ebé iha konxiénsia moos no iha damen ho nia-an rasik no ho Maromak”. Hodi haforsa liutan Padre haktuir fali Don Bosco nia liafuan ba Domingos Savio dehan; “ó mak sai hena di´ak atu suku vestidu ida furak ba Maromak. Ohin husu mós mai ita ida-idak atu sai hena di´ak ida ba Maromak ho moris ne´ebé riku ho Virtudes di´ak sira hodi sai instrumentu damen nian hodi lori domin, ksolok, laran di´ak, respeita no obedese iha liberdade.
Nune´e atu liafuan sira ne´e sai konkretu mai ita horik nafatin ho Jesus, koalia ho Nia no halo tuir buat ne´ebé Nia hatudu liu husi ema di´ak sira nia prezensa wainhira fó hanoin buat ruma atu halo, tanba sai ó nia anju da guarda ne´ebé sei salva ó nia klamar”.
(Ágata Freitas)
