Venilale – Loron ikus fulan Setembru, nu’udar konkluzaun ba fulan Bíblia ita selebra festa S. Jerónimo nian, santu ne’ebé dedika nia moris ba estudu Bíblia nian, no rekoñesidu «doutór eminente interpretasaun Sagrada Eskritura nian».
Loron ne’e momentu oportunu atu hanoin fali ninia hanorin sira kona-ba importánsia Bíblia ba Sarani sira. S. Jerónimo hateten katak esensiál ba sarani ida hakbesik ba testu bíbliku sira, tanba «ignora Eskritura katak ignora Kristu» (Commento ad Isaia, prol.). Nia hakerek ba feto-raan ida Roma nian nune’e: «Se ó reza ó ko’alia ho ó-nia espozu; se ó lee, Nia mak ko’alia ho ó. Ba amlulik Nepoziano nia rekomenda: «Lee beibeik Eskritura Divina sira; loloos. Labele husik Livru Santu husi ó-nia liman. Aprende husi ne’e buat ne’ebé ó tenke hanorin».
Fatin privilejiadu atu lee no rona Maromak nia Liafuan mak Liturjia, iha-ne’ebé, hodi selebra Liafuan no halo prezente Kristu nia futar Isin, ita atualiza Liafuan iha ita-nia moris no halo nia prezente iha ita leet. Tan ne’e mak ohin, iha Santa Missa, molok Liturjia Liafuan nian ami lori Maromak nia Liafuan iha prosisaun, hodi entroniza nia Liafuan. Ami lori iha prosisaun maibé liuliu buka lori Maromak nia Liafuan iha an rasik, tanba hodi lori iha 
ita, ita lori moris rohan-laek iha ita.
Iha rekreiu, Ir Jacinta Gusmão anima grupu sira tuir asosiasaun, hamutuk hitu, ho jogu “korrente personajen nian” no jogu Bíblia ho dadu (tipu snake and ladder). Ho Jogu bele koñese liután lala’ok Istória Salvasaun, husi kriasaun to’o Jezús nia Moris-Hi’as.
(Redasaun fmatin-JG)
