Dili iha 24-janeiru-2025, iha sentru formasaun Joao Paolo II, iha selebrasaun primeira votus ba irman nain 3, Abiuda, Meliana no Jeralda ne’ebè entrega sira nia-an hodi moris tuir espiritu don Bosco no Madre Mazzarello nian. Iha selebrasaun ida ne’e marka presenza husi irman Assunta nu’udar delegada visitadora ba ispetoria TIN, padre provincial Salesiano nian no padre co-selebrante sira, familia husi irman nain 3 nian. Ba kongregasaun Salesiano, momentu ida ne’e mak nu’udar momentu ksolok no grasa nian, tanba bele aumenta tan familia iha kongregasaun Salesiana, nune’e bele lao hamutuk iha sinodalidade hodi haklaken Maromak Nia reinu tuir modelu bibi atan diak nian. Tuir mai irman Abiuda sei espresa ninia ksolok no esperiensia ba eventu no bolun ida ne’e.
Esperiensia primeira profisaun
Agradese Maromak ba grasa ksolok ne’ebé haú simu iha haú nia profisaun dahuluk hodi saran-an tomak ba Na’I iha Institutu Filhas de Maria Auxiliadora. Hanoin fali ha’u nia tempu sira formasaun nian estuda no asimila ona konstituisaun ida ne’e mak fó korajen atu haboot liutan ha’u nia domin ba Na’I liuhusi misaun ne’ebé ha’u sei hala’o no tau laran metin nafatin ba Nia atu loron ba loron deskobre liutan nia hakarak. Iha moris konsagrada ida ne’e, ksolok ne’ebé iha mak moris tuir Maromak nia hakarak liuhusi ninia instrumentu sira ne’ebé gia no tau matan hodi moris tuir fundador sira nia hanorin. No iha momentu ksolok no festa nian ne’e ema ida-idak espresa sira nia klosok husi jestu ne’ebé hatudu no haree ema nia prezensa nudar koragen atu hakbiit liutan ha’u nia vokasaun husi familia, irmán, labarik no foinsa’e sira. Nune’e atu hala’o knar ne’e nafatin laran metin ba Lema ne’ebé sai forsa no guia mai ha’u nia viajen moris nian, husi Maromak nia liafuan (Jo.15:9 “Hela iha Ha’u nia domin ba”) ho Maromak nia domin no tulun mak halo ha’u buras ho Ninia grasa no husi ema nia suporta no domin ne’ebé apoiu iha klima ksolok no espiritu familia nian fo aten-brani atu la’o ba oin ho ksolok tuir Maromak nia hakarak. Madre Mazzarello dehan “fuan ne’ebé haksolok mak fuan ida ne’ebé hadomi Maromak”.Nune’e ha’u agradese ba tulun hotu no agradese mós Inan Virjen, nia ne’ebé halo buat hotu, iha ha’u moris hahú no haú nia formasaun sira tahan nafatin ha’u to’o momentu ha’u sai Maria nia oan feto.
Ir. Abiuda Monteiro dos Reis,FMA
