Venilale – Vizita kanónika Superiora Inspetoria nian mak tempu ida ba Irmán FMA ida-idak no komunidade edukativa atu sente Maromak nia prezensa forte ne’ebé interpela ita-nia moris no misaun.
Vizita ne’ebé hahú ohin 13 Jullu, signifikativu tebes tanba ne’e mak loron komemorasaun Madre Mazzarello nian. Komunidade edukativa fó benvinda ba Ir Alma Castagna, Provinsiál ho knananuk “Eis aqui a Serva do Senhor”, knananuk Loron Mundiál Juventude nian ne’ebé sei halo iha Panamá, maibé hodi dedika ba madre provinsiál ne’ebé mai hodi Na’i-Feto nia naran no sei tulun ami ida-idak atu sai mós hanesan Feto-raan Nazaré nian ne’e. Espetativa husi foin-sa’e ne’ebé fó benvinda mak ho madre Alma nia prezensa bele konfirma no habiit liután dalan ne’ebé komunidade edukativa halo daudaun atu sai disponivel no laran-luak hanesan “labarik ne’ebé oferese nia paun fuan lima no ikan rua” ba Jezús no maluk sira (kf Jo 6,9).
Remata orasaun Provinsiál ne’ebé apresia dansa no knananuk benvinda nian, foti hanoin ruma husi movimentu, ritmu no koordenasaun armónika dansa nian atu hato’o hanoin rua, katak, ida mak atu nafatin hateke ba malu, la’o hamutuk no rua, atu moris iha armonia no kolaborasaun hamutuk.
Iha enkontru abertura vizita nian ho Irmán sira, madre Alma, subliña importánsia Vizita Kanónika hanesan ita-nia Konstituisaun no Regulamentu sira haruka. Artigu Regulamentu 109 dehan katak “Iha okaziaun vizita nian ho modu fraternu partilla Irmán sira nia moris loroloron no verifika ho sira validade projetu komunitáriu, ba animasaun ida ne’ebé efikás”. Ne’e mak tempu ida grasa nian, tempu ne’ebé Maromak halo ita sente liu nia prezensa hodi fó hanoin filafali ita-nia hilin sira pesoál no komunitária.
Importante iha tempu ne’e atu halo diálogu no rona, atu dixerne no husu se ita-nia prezensa iha-ne’e “hatán ba Kreda, komunidade no fatin ida-ne’e nia presiza”, hanesan Konstituisaun artigu 146 hateten: “Liuhusi diálogu komunitáriu fraternu nia (Inspetora) sei iha interese, ba realidade lokál sira, atu bele iha prezensa efetiva liután iha Kreda”.
