Dili – TOT produsaun “food and beverage” ba formadór sira husi Centro Formação Cristal remata ohin. Irmán Santina Moreira nu’udar treinadora no hodi Centro Formação João Paulo II no Mazzarello Bakery nia naran, entrega fila fali trainee sira ba Centro Fundação Cristal.
Grupu dahuluk ne’ebé hala’o formasaun mak grupu feto na’in hitu husi loron 5 Novembru to’o loron 14 Novembru liubá. Grupu daruak mak mane mane na’in hitu husi loron 25 Novembru to’o loron 5 Dezembru 2012. Iha serimónia simples ohin nian, irmán Santina valoriza liu empeñu trainee sira-nian atu aprende ho entuziazmu. Nia salienta katak, mane sira ne’ebé iha Timor baibain la kaer sasán sira dapur nian, iha duni interese atu aprende….Loroloron sira hakarak aprende buat foun nafatin hodi lla repete buat ne’ebé aprende ona iha loron antes. Husi Centro Formação Cristal, sira agradese ba formasaun ne’ebé sira simu no hein katak sira-nia membru sira bele dezenvolve liután sira-nia skills hodi pratika liután no hodi halo buat foun seluk.
Ikusnian, irmán Santina entrega folder ida ba trainee ida-idak reseita sira-nian ne’ebé sira aprende ona. Iha folder laran iha reseita sira ba snack hanesan: “akar kelapa, nagasari, kiri-kiri pedas, mekar, cheese stick, lemper ayam, donat, cassava, pastes, hunkue no onde-onde. Kona-ba bebida sira aprende reseita sira kona-ba pinacolada, juice, shaky no smoothy oioin husi ai-fuansira ne’ebé bele hetan iha Timor-Leste.
Centro Formação João Paulo II mós sei entrega iha loron segunda mai, ekipamentu ruma ba trainee sira atu sira bele duni halo buat ne’ebé sira aprende.
