Dili – Depoizde Kapítulu Jerál XXIV (KJ 24)ne’ebé hala’o iha Roma husi loron 17 Setembru to’o 24 Outubru 2021, oras-ne’e mak tempu atu tranzmite ba komunidade sira iha Timor no Indonesia. Iha Timor-Leste, tranzmisaun fahe ba grupu haat: grupu diretora sira-nian no Irmán seluk ne’ebé labele partisipa iha tempu seluk iha loron 12 Novembru iha Dili; grupu daruak ba Irmán sira iha Dili iha loron 20 Novembru; grupu datoluk iha Laga iha loron 26 Novembru; grupu dahaat iha Venilale iha loron 27 Novembru. Ba Indonesia sei hein oportunidade tanba ho pandemia la iha posibilidade atu bá.
Tranzmisaun hahú hodi fahe esperénsia sira tuir kronograma loron sira Kapítulu Jerál nian. Kapítulu hahú iha Inspetoria sira, iha kapítulu inspetoriál. Ninia rezultadu haruka ba Roma hodi elabora instrumentu serbisu nian ne’ebé haruka hikas ba inspetora no delegada sira atu estuda. Maibé, tan KJ24 tenke adia ba tinan ida, kapítulu nia serbisu nia parte ida halo online iha nivel interinspetoriál. Nune’e, aleinde dokumentu instrumentu 
serbisu nian, iha mós livriñu seluk ne’ebé rezultadu husi serbisu, reflesaun no partilla sira kona-ba oinsá hatán ba dezafiu sira kontemporaneidade nian (pandemia) atu sai jenerativa iha nivel interinspetoriál.
Iha tranzmisaun, hato’o uluknanai relatóriu Institutu nia moris husi tinan 2015-2029. Aleinde ne’e ilustra mós oinsá metodolojia serbisu nian iha KJ 24 ho Irmán na’in 172 husi nasaun 92. Metodolojia serbisu hetan iha livriñu “Regulamentu KJ nian”. Serbisu kapítulu nian hala’o iha komisaun estudu lima nia laran no hafoin hato’o iha asembleia. Maibé dalaruma serbisu hala’o mós iha grupu konferénsia interinspetoriál. Momentu importante liu kapítulu nian mak dixerniemntu no eleisaun ba Madre Jerál no ninia Konsellu.
Esperiénsia furak barak hala’o durante KJ 24, hanesan espíritu família, espíritu rekollimentu no orasaun, respeitu no hakmatek, unidade iha diversidade. Bele haree rikeza karizma nian ne’ebé foti oin lahanesan iha kultura sira.
Prezente/don boot ba FMA sira hotu, la’ós de’it ba kapitulár sira mak vizita surpreza Papa Francisco nian iha loron 22 Novembru 2021. Ninia prezensa hatudu oinsá ninia apresiasaun no estima ba Institutu FMA. Ninia majistériu sai rikusoin ida atu FMA hotu bele moris tuir atu bele halo karizma sai nafatin joviál.
Depoizde aprezenta lala’ok tuir kronograma, parte ikus tranzmisaun nian mak hato’o dokumentu finál KJ 24, liuliu “hilin prioritáriu sira” no “deliberasaun” kapitulár.
Tranzmisaun hahú ho orasaun invoka Na’i nia Espíritu no remata ho enviu atu lori tua foun no di’ak ba foin-sa’e sira no ba ema hotu misaun haruka ita bá. Kapítulu Jerál XXIV remata iha loron 24 Outubru, maibé kontinua iha ita FMA ida-idak nia istória, iha komunidade edukativa hotu, iha fatin sira ne’ebé ita partilla moris no misaun hamutuk ho foin-sa’e sira, leiga no leigu sira iha beleza komuñaun nian iha diversidade.
(JG)
